2 bata 'nakasalbar' sa amahan

CEBU, Philippines - Duha ka mga batang menor de edad ang nakasalbar sa kinabuhi sa ilang amahang negosyante gikan sa tinong kamatayon human nila babagi ang duha ka mga gunmen nga misuway og patay sa ilang amahan.

Ang insidente nahitabo sa sitio Kalubihan sa barangay Pajac, dakbayan sa Lapulapu diin usa ka Macrohon Pradia, 42, ug tag-iya sa Pradia Motor Parts nga nahimutang sa maong dapit ang gisuwayan sa pagpatay sa miaging Lunes sa buntag.

Si PO2 Franklin Bolaquia sa homicide section sa kapolisan sa maong dakbayan nga nahinabi sa Banat News miingon nga nagbantay sa iyang tindahan sa piyesa sa mga motor ang biktima dihang mihunong sa atubangan niini ang duha ka motorsiklo nga adunay angkas nga tagsa ka mga lalaki.

Ang mga angkas gikatahong nanganaog ug miduol sa biktima ug nagpasumangil nga nangita og piyesa nga gi-display sa tindahan sa biktima apan samtang giabi-abi kini ni Pradia kalit mibunot og armas ang duha dayong pusil niini.

Pagkaigo sa tiil sa biktima mikaratel kini dayon og dagan pasulod sa ilang balay ug gisundan sa mga mamumuno apan gibabagan sila sa duha ka mga batang anak sa biktima.

Ang mga bata gikatahong maoy gipangtionan sa mga mamumuno sa ilang armas ug nanibat nalang ug wala mopadayon.

Ang mga motorsiklo giingong mipasutoy padulong sa barangay Bankal sa maong dakbayan. Padayon pa karon ang kapolisan sa pagtino sa motibo sa krimen. (BANAT NEWS)