Ikatulong sunog sa siyudad rice cooker ang hinungdan

CEBU, Philippines - Onse ka mga balay ang nangaugdaw ug laing tulo ang partially damage sa sunog nga miigo sa sitio Upper Kawayan sa barangay Sambag 2 dakbayan sa Sugbu alas 9:15 sa buntag nga gikombate sa kabomberohan sulod sa 20 minutos.

Ang unang nasunog mao ang duha ka andanang balay nga boarding house nga gipanag-iya ni Gloria Abregana nga may pito ka kwarto sa ikaduhang andana ug usa sa niabang niini mao si Gerry Solis kinsa giingong nagluto sa rice cooker ug nakalimtan pagpawong ug mibuto nga maoy sinugdanan sa pag-ulbo sa kalayo.

Ang nagpuyo sa ground floor sa balay ni Abregana ang iyang pag-umangkon nga si Alexander Abregana.

Lakip sa nasunog mao ang balay nila ni Rodulfo Libron; Semiona Cajes; Clark Diolen; Cipriano Balili; Lorna Buyoc; Ipifania Anoling; Ezperanza Bocog; Delisa Remata ug Josefina Anoling ug Antonia Campoy.

Samtang ang tulo ka balay nga partially damage gipanag-iya nila ni Wennie Wenceslao; Jonathan Alfafara; ug Felipe Alburo.

Si SFO3 Jimmy Layao, imbestigador sa Cebu City Fire Department nga nahinabi sa mga tigbalita nagkanayon nga ilaha pang ipatawag si Solis aron mohatag og katin-awan sa alegasyong nabiyaan niini ang gilutong rice cooker.

Daling gipaubos sa general alarm ang sunog hinungdan nga miresponde ang tanang bombero sa Metro Cebu area apan wala kaayoy nasugatang problema sa operasyon gawas lang sa pipila ka mga dalang dead end ug di kalahos-lahos ang fire trucks.

Si Sr. Supt. Aderson Comar, Cebu City Fire Marshall nagkanayon nga usa sa fire prone areas sa siyudad ang barangay Sambag 2 tungod sa pagsikit-sikit ang mga balay hangtud na sa kilid sa sapa.

Gibana-banang mokabat sa P800 mil ang danyos sa maong sunog.   

“Migawas ko sa balay ‘sus, nakakita man ko sa aso, wala gyud tawon koy napupho sa akong mga butang kay nahurot man pagkaugdaw,” matud pa ni Antonia Campoy nga usa sa nasunogan nga nahinabi sa Banat News.

Si Mayor Michael Rama nga miadto sa fire scene miingon nga usa sa iyang nakita nga problema sa dapit mao ang accessibility nga kaagian aron maka-penetrate pag-ayo ang mga bombero.

Iyang giawhag ang mga inila nga pamilyang namuyo sa maong lugar nga kinahanglan mangita sila og paagi paghimo og road network development plan aron matun-an sab sa kagamhanan sa dakbayan.

Kini maoy ikatulong higayon nga sunodsunod ang sunog nga miigo dinhi sa dakbayan sukad niadtong Domingo sa gabii sa barangay Mambaling gisundan dayon pagka Lunes diha sa barangay Sto. Niño. (BANAT NEWS)