1 patay ug 3 angol sa motorsiklo

CEBU, Philippines - Maayong pagkapusa sa ulo sa usa ka 15-anyos nga menor de edad samtang nakaangko’g mga bali sa kalawasan ang laing duha ka mga kauban niini human mosaliring ang kusog kaayong nagdagang motorsiklo nga ilang gisakyan ug nakadasmag pa og bata una pa nasampak sa punoan sa kahoy sa miaging gabii.

Ang aksidente nahitabo diha sa barangay Poblacion lungsod sa Barili diin nakalas si Annex Jhon Davon, 15, nagpuyo sa sitio Daro sa barangay Poblacion, samtang ang ilang nadasmagan mao si John Mark Bayno,12.

Grabe usab ang naangkong kadaot sa kalawasan sa angkas ni Davon nga sila si Jason Caquilala Bayaton, 20, taga Poblacion, Junel Guivengcan kinsa gidala usab sa Barili District Hospital.

Si Davon gideklarar sa doktor nga dead on arrival tungod sa pagkapusa sa ulo niini diha sa punoan sa gemilina tungod sa kakusog sa pagkasampak.

Si PO1 Richard Cababat, desk officer sa Barili Police Station nga gikahinabi sa Banat News nagkanayon nga gikan sa Dumanjug sila si Davon sakay sa motorsiklo nga walay plate number nga kusog kaayo ang dagan padulong sa Barili.

Pag-abot sa gamay’ng kurbadahon sa nahitaboan wala na makabawi ang motorsiklo nila ni Davon hinungdan nga misariling kini ngadto sa daplin ug nadasmagan si Bayno kinsa naglakaw daplin sa dalan ug pagkahuman nalahos sila sa punoan sa gemilina. “Nagkatag sila. Ngitngit man gud na dihang dapita,” asoy pang Cababat. Dugang niya nga wala nila ma-identify si kinsa ang nagdala sa motorsiklo niadtong higayona kay ang duha nga kauban ni Davon naglisod pagsulti tungod sa ilang kahimtang ug igo lang gi-admit sa district hospital ug gibalhin dayon sa Vicente Sotto Memorial Medical Center (VSMMC). -Rey B. Pasaporte/EIM (BANAT NEWS)