Mga bala ug pisa sa armas nasakmit

CEBU, Philippines - Laing 40-footer container van nga may sulod nga piyesa sa mga high-powered firearms ug kinahon nga mga bala nga gisagol sa mga piyesa sa sakyanan ug mga gamit sa balay gikan sa Estados Unidos ang gisakmit sa Bureau of Customs dinhi sa Sugbu kagahapon.

Giablihan ni Cebu Customs District Collector Atty. Ronnie Silvestre uban sa mga sakop sa Enforcement Security Services (ESS) ug Customs Intelligence and Investigation Services (CIIS) ang 40-footer van nga giingong kauban sa unang 40-footer container van nga ilang gisakmit kapin usa ka semana na ang nakalabay nga gisudlan gihapon og mga armas ug bala.

Atol sa pag-abli sa maong container van kagahapon, pito ka mga kahon sa mga bala nga adunay selyo sa European Union nga may markang 7.62 caliber nga bala sa AK 47 rifle, mga assorted nga parts sa M16 Armalite rifle nga giputos sa mga sinina ang sulod niini.

Matud pa ni sa Rico Mongaya ug sa Andie Catre sa ESS Operation Division miabot ang maong container vans niadtong Nobiyembre 24 gikan sa nasud sa Estados Unidos.

Sumala pa nila kadudahan kaayo ang karga niini base sa deklarasyon nga mga used household materials ug disassembled nga truck head ang sulod niini tungod kay nakadawat sila og impormasyon gikan sa US Homeland Security Service nga kontrabando ang sulod niini.

Sa pagsusi sa BOC sa dokumento , nasuta nga ang tag-iya sa maong shipment mao ang D. Golden House Trading Company nga nahimutang sa Bacalla Compound, Holy Name, barangay Mabolo Cebu City.

Ang SIGA sa Panorama , California USA maoy mipadala niini ug ang broker mao si Miguel Panis nga usa ka rehistradong broker sa buhatan sa BOC.

Si Silvestre nagdudang usa ka sindikato ang nagpaluyo sa maong mga kontrabando gumikan kay base sa taho nga iyang nadawat gikan sa Homeland Security Agency ang maong shipment kauban sa ilang nasakmit sa milabay’ng semana nga ang consignee mao ang usa ka Renato Ramos ug ang nagpadala didto sa Estados Unidos mao si Rey Tagaloguin.

Matud pa ni Silvestre ang maong mga containers adunay kaubang duha ka containers nga didto gipadala sa kaulohan kagahapon apan usa ra ka container ang nadakpan ug ang usa nakalusot sa Manila International Container Port.  

Gisubay na sa BOC ang mga pangalan sa dokumento ug sa mga address nga gibutang niini apan hangtud sa pagsulat ning balita wala pay bisan usa kanila ang mipatim-aw diha sa BOC.(/EIM)(BANAT NEWS)