Dakong hotel gikiha'g pilferage sa VECO

CEBU, Philippines - Usa ka dakong hotel ning dakbayan ang nag-atubang karun og kasong kriminal tungod sa gikatahong pagpangawat niini og kuryente sa Visayan Electric Company Inc.

Ang kadagkuan sa VECO misang-at sa kasong kalapasan sa Republic Act No. 7832 kon Anti-electricity and electricTransmission Lines/Materials Pilferage Act of 1994 kagahapong adlawa sa buhatan sa City Prosecutors Office batok sa nahisgutang hotel.

Matud pa ni Ethel Natera ang tigpamaba sa VECO nga niadtong buwan sa Pebrero petsa 17 na nila nabantayan nga daw gimaniobra sa maong hotel ang ilang konsumo sa kuryente aron gamay nalang ang ilang mabayran sa kuryente.

Ang VECO Revenue Protection Staff misusi sa hinungdan niini ug giingong nasakpan nilang adunay gihimong illegal ang maong hotel maong migamay ang ilang bill sa kuryente.

Matud pa ni Natera nga ilang gibuyag ang maong hotel ug gani ilang gipatawag ang kadagkuan niini apan gikatahong gihimakak nila ang nadiskubrehan sa Revenue Protection Staff.

Midugang usab si Natera nga pipila na ka higayon nilang gipakigkitaan ang kadagkuan sa maong hotel aron pabayron sa gihimo niining kalapasan apan giingong nagmagahi kini hinungdan sa ilang pagpasaka og kaso.

Samtang nangayo usab og bayad ang VECO sa differential billing nga nagkantidad og P168.6 milyones gikan sa buwan sa Agosto tuig 2007 hangtod niadtong buwan sa Pebrero karung tuiga. Samtang ang abogado sa VECO nga si Atty. Jess Garcia, miangkon kini maoy labing dakong differential billing nga ilang napasaka batok sa ilang konsumidor.

Butyag usab ni Garcia nga andam sila nga makighusay sa maong hotel apan gikinahanglang bayran nila ang VECO. (BANATNEWS)