Selosa nagpusil sa ulo

CEBU, Philippines - Patay dihadiha ang usa ka ginang human kini nag-unay og pusil sa iyang ulo atubangan sa iyang duha ka anak tungod sa grabing pagselos ngadto sa iyang kapuyo diha sa bukirang barangay sa Cambugho siyudad sa Danao alas 9:00 sa gabii niadtong Domingo.

Ang nagpakamatay pinaagi sa pagpusil sa iyang ulo mao si Juliet Bucag, 34, minyo apan buwag na sa iyang bana ug duna nay laing kapuyo nga si Rogelio Gomez, 48, kinsa buwag na usab sa asawa.

Matud ni SPO2 Ildefonso Prosia, desk officer sa Danao City Police Station sa Banat News sa adlawan pa nianang Domingo nagkalalis si Bucag ug Gomez human makit-i ang naulahi nga nakig-estorya sa kanhing asawa niini.

Nianang pagkagabii giingong gisukmatan ni Bucag si Gomez dihang paingon na silang mangatulog.

Sumala pang Prosia nagtion nang daan sa usa ka .22 kalibreng armas si Bucag sa iyang ulo samtang nagkugos kini sa iyang gamay’ng anak ug gitupad sad ang kinamaguwangan nilang anak nga 11-anyos sa iyang tinuod nga bana.

Matud pang Prosia si Gomez miangkong wala gyud siya makahimo og lakang aron ilogon ang armas gikan kang Bucag tungod sa kahadlok nga mapagan ang mga bata.

Nasuta nga nahadlok si Bucag nga magkabalikay si Gomez ug sa asawa niini ug bisan giunsa pagpasabot sa naulahi giingong dili gyud kini maminaw hangtud nga gikablit niini ang maong armas tumong sa tampihak ug namatay.

Ang armas nga padayon pang gisubay sa kapolisan kung si kinsay tag-iya gitugyan ni Gomez ngadto sa mga opisyal sa barangay kinsa mao nay mi-turnover niini sa kapulisan. Aron pagwala sa pagduda gikatakdang i-paraffin test si Bucag ug si Gomez pagtino kung kinsa nakapabuto kanila sa armas.(/EIM) (BANATNEWS)