Binandol nga marijuana nasakmit

CEBU, Philippines - Upat ka tawo duha niini ang giingong naaktuhang nanuyop og shabu ang nadakpan sa saturation drive sa kapolisan sa dakbayan sa Talisay diha sa Canton Ville, barangay, San Isidro, dakbayan sa Talisay niadtong Domingo sa gabii.

Ang nasikop mao ang managpuyo nga si Raquel Empaces ug Carl Lewis Malazarte, parehong 23-anyos ug nagpuyo sa maong dapit, ilahang duha ka mga barkada nga si Tresevan Eugene Cabuenas, 22, taga barangay Jaclupan, Talisay ug Roland Dapitan, 23, taga sitio Isla Verde, San Isidro.

Na-recover sa mga polis gikan sa mga suspetsado ang walo ka bundle nga mga linikit nga marijuana diin matag bundle duna kini sulod nga 60 ka mga sticks ug laing 40 ka sticks sa pinaugang dahon sa marijuana, mga pinaugang dahon sa marijuana nga wala pa maputos diha sa plato, usa ka bundle sa mga ugang punoan sa marijuana nga wala nay mga dahon, duha ka gagmay’ng pakete sa aluminum foil nga dunay sulod nga shabu, mga drug paraphernalia, resibo ug kwartang P3,128 ug tulo ka mga cellphone.

Ang mga suspek pulos mihimakak sa mga pasangil. Apan si Supt. Eddie Recamara, hepe sa Talisay City Police Station nga nahinabi sa Banat News mibutyag nga duna silay nadawat nga report nga dunay namaligya og marijuana sa maong lugar.

Si Inspector Hugo Rio Ipong uban nila ni SPO1 Mikie Espina, PO3 Benedicto Lasque, PO2 Roy Lofranco ug PO2 Stephen Sefuesca daling mipahigayon og saturation drive.

Matud ni Recamara nga naaktuhan ang duha ka tawo ug dihang nagkatibulaag nasundan ang usa ngadto sa gikahimutangan sa managkapuyo nga miresulta sa ilang pagkasikop. Kasong paghupot og ilegal nga drugas ang ipasaka batok sa managkapuyo samtang sila si Cabuenas ug Dapitan kasohan og drug use. (BANATNEWS)