Onse ka samad dinunggaban

CEBU, Philippines - Usa ka inahan ang napalgang patay nga nabulit og onse ka samad dinunggaban sa kalawasan pasado alas-2 sa miaging hapon sa sitio Cabancalan barangay Dakit syudad sa Bogo.

Ang biktima nailhan nga si Carmencita Aragon , 62, molupyo sa Alumnos- Basak barangay San Nicolas sa dakbayan sa Sugbu ug usa kini ka organizer sa Home Owners Organization-Urban Poor.

Sa pakighinabi sa Banat News ni Bogo City Police Chief Investigator PO3 Allan Dosdos misaysay nga napalgan ang biktima sa kasagbotan sa mga nagduwa nga mga bata.

Matud pa ni Dosdos nga nakaangkon og onse ka samad dinunggaban ang biktima diin kasagaran niini sa dughan ug sa tiyan. Midugang si Dosdos nga ang biktima giila kini sa iyang anak nga si John Lester Aragon ug sa manghod sa biktima nga si Gemma Ramirez.

Nagduda ang mga imbestigador nga posibleng diha ra gidunggab ang biktima sanglit 10-metros gikan sa gihagbaan sa patay’ng lawas adunay nagpasad nga dugo.

Matud pa ni Dosdos nga ang igsuon ni Aragon nga si Ramirez ug ang anak niini natingala nganung naabot sa syudad sa Bogo ang biktima.

Apan nasayran sa kabanay ni Aragon nianang Biyernes sa buntag aduna kini kaestorya sa telepono nga buot magkigkita niini sa usa ka simbahan.  

Midugang si Dosdos nga wala gyud sila’y nakuhang butang gikan sa biktima. Apan ang igsuon sa biktima mibutyag nga sa diha nga milakaw kini sa ilang panimalay nagdala kini og bag nga adunay duha ka cellphone ug kwarta nga labing menos P5 mil.

Butyag pa ni Dosdos nga adunay posibilidad nga gitulis ang biktima ug posibleng misukol hinungdan nga gipatay kini.

Apan gawas sa tulis gitan-aw usab ni Dosdos kun ang gikaestorya ni Aragon sa telepono may kalambigitan sa krimen.

Ang kapolisan nangita pa og impormasyon kabahin sa motibo ingon man ang pagpangita og saksi. (BANAT NEWS)