Basura di ipasunog ni Magpale

CEBU, Philippines - Aron mahimong makahuloganon ang kasaulogan sa Clean Air Month niining buwan sa Nobiyembre, si Acting Governor Agnes Magpale nanawagan sa tanang Sugboanon nga likayan ang pagsunog ug pagdaob sa mga basura sa ilang tagsa-tagsa ka mga panimalay aron malikayan ang kadaot ug pagkahugaw sa hangin nga atong mahanggap dinhi sa Sugbo.

Ang maong awhag sa bise gobernador maoy iyang reaction sa migawas nga taho sa Metro Cebu Airshed Governing Board sa milabay’ng semana nga nakapaalarma sa Environmental Management Bureau-7 tungod kay nagkataas ang "total suspended particulates" nag-akal nga abog nga ilang nakita sa hangin dinhi sa Sugbo ilabi na sa syudad sa Naga.

Sayo niini si Provincial Board Member Thadeo Ouano kinsa maoy chairman sa Environment Committee sa hawanan sa hunta provincial mipasar og usa ka resolusyon nga nag-awhag sa tanang mga lokal nga mga opisyal ug mga negosyante dinhi sa lalawigan sa Sugbo nga limpyohan ug ipaubos sa regular tune-up ang mga makina sa sakyanan aron dili kini mobuga og hugaw’ng aso sa tambotso sa ilang mga sakyanan

Matud pa ni Magpale nga gawas lang kun tumanon kini sa mga driver sa sakyanan, pulos abog ang atong mahanggap dinhi sa Sugbo matag karon ug unya.  (BANATNEWS)