Coal ash halinonon

CEBU, Philippines - Gilaoman sa Kapitolyo nga mahalin na ang coal ash nga gitapok sa Korean Electric Power Corporation-Salcon Power Corporation (KEPCO-SPC) didto sa yuta sa pamilyang Balili sa dakbayan sa Naga nga napalit sa Kapitolyo dili pa dugay.

Kini human makigsabot sa kagamhanan sa lalawigan ang duha ka mga dagkong kompaniya sa pabrika sa semento kinsa maoy agresibong mihangyo nga silay mopalit sa maong mga material.

Dili pa dugay nagpinirmahay na og memorandum of understanding (MOU) si Governor Gwendolyn Garcia ug Enrison Benedicto, ang chief executive officer sa Mabuhay Filcement, Inc. ug Stanley Chona, ang vice-president of Geo-Transport and Construction, Inc.

Ang kagamhanan sa lalawigan sa Sugbo, nga maoy adunay dakong katungod sa pagpangita og kalabayan sa coal ash ubos sa Ash Disposal Landfill Facility Services Agreement tali sa Kapitolyo ug Kepco, mitumbok nga ang pagpirma sa duha ka mga   kompanya og MOU maoy sulbad sa nagtipun-og nga abo sa karbon sa yuta nga dili pa dugay napalit  sa kagamhanan sa lalawigan.

Gipadayag sa mga tinugyanan sa mga kompaniya nga mopalit niini nga himoon nilang sagol sa produkto nga semento nga ilang pabrikahon ang maong mga material nga abo sa karbon.

Hinuon si Joseph Mallare, ang technical quality control manager sa Geo-Transport Inc. miingon nga ila nang gikuhaan og sample ang maong mga coal ash ug gipaubos na sa laboratory test didto sa ilang ulohang buhatan sa Manila aron hingpit nilang mapalit ang maong mga   abo sa KEPCO sa sunod tuig. (BANATNEWS)