CEBU, Philippines - Miulbo ang sunog sa pabrika sa mga armored vehicles diha sa Mactan Export Processing Zone (MEPZ) sa barangay Pusok, dakbayan sa Lapulapu alas-12 ang takna sa miaging tungang gabii.
Si MEPZ Fire Chief Orly Fuentes nga nahinabi sa Banat News miingon nga kalit miulbo ang kalayo sa compound sa British Armored Bullet Proof sa sulod sa MEPZ.
Ilaha hinuon dayong nakontrolar sulod sa 3-minutos ang pagpawong niini ug wala makamugna og dakong kadaot sa pasilidad.
Sa pagsusi sa mga imbestigador mga basurang papel ra ang gilamoy sa kalayo ug wala makatapon sa mga edipisyo.
Duha ka mga fire trucks sa MEPZ ang unang nakaresponde nga gitabangan sa mga sakop sa Emergency Rescue Unit Foundation (ERUF).
Si Fuentes miingon nga gikan sa faulty electrical wiring ang gidudahan nilang sinugdanan sa sunog nga misilaob ug nalagpot didto sa mga tinapok nga papel. Wala say nasakitan sa mga trabahante niini. (BANAT NEWS)