Estudyante di pugson pagpaamot

CEBU, Philippines - Gipasidan-an sa Department of Education (Dep-Ed) ang mga principal ug magtutudlo sa publikong tunghaan nga himoong simpli og yano ang selebrasyon sa pasko o Christmas party ug likayan ang pagpugos pagpa-amot sa mga tinun-an ug kutob sa molapas niini pahamtangan og silot.

Si Regional Director Recaredo Borgonia sa DepEd7 samang higayon mimando usab sa mga magtutudlo ug principal nga labaw nang dili mopugos pagpaamot sa mga tinun-an aron lang ipalit og nindot nga dekorasyon sa Pasko sa ilang mga classroom.

Gihimo sa direktor ang maong pasidaan gumikan sa kalisud sa kahimtang sa panginabuhi karong panahona busa dili angay hatagan og dugang problema ang mga ginikanan sa mga tinun-an pinaagi sa pagpangayo og dugang mga amotan.

Gipasabot sa director nga salikwaot kaayong paminawon nga adunay mga tinun-an ang di makasalmot sa christmas party tungod kay wala makaamot.

Nagkanayon ang director nga mahimo ra nga saulogon ang Pasko sa simpli ug yano nga paagi ug dili ipakita sa bongga nga dekorasyon ug okasyon.

Busa gihagit sa direktor ang mga ginikanan pag-report dayon sa ilang buhatan niadtong mga magtutudlo ug principal nga mopugos pagkolekta og amotan   sa ilang mga tinun-an alang sa Pasko. (BANAT NEWS)