Polis sa 'carnapping' imbestigaron

CEBU, Philippines - Suportahan ni Police Regional Office-7 director Marcelo Garbo Jr. ang buhatong lakang kabahin sa isyu sa carnapping nga diin nalambigit ang usa ka polis.

“PRO-7 will be in full support whatever the action of HPG-7, I had directed Colonel Lawas to tell the real story, we know the facts, but facts may not be the real story,” ni Garbo pa.

Ang hepe sa PRO-7 nagkanayon nga kung mapamatud-an nga dunay nahimong kalapasan si PO2 Alvin Hernandez pahamtangan gyud kini og tukmang silot aron madisiplina.

Kahinumduman nga si Hernandez kinsa sakop sa Regional Intelligence Division (RID)-7 gilambigit sa maong isyu tungod kay kini maoy gitumbok nga mibaligya unta sa usa ka kinawat nga multicab ngadto kang S/Supt. Jose Antonio Rodrigo, hepe sa PNP Crime Laboratory-7.

Ang maong multicab gipanag-iya ni Felix Enopia taga sitio Nonoc, barangay Tabunok, dakbayan sa Talisay kinsa mao say nakakita sa iyang sakyanan diha na sa parking lot sa Camp Sotero Cabahug niadtong Miyerkules nga gi-deal na diay.

Si Garbo nakadawat na og impormasyon kabahin sa hitabo gikan kang Sr. Supt. Louie Oppus ang hepe sa operations sa PRO-7 ug mimando na siya kang Sr. Supt. Rey Lyndon Lawas nga hepe ni Hernandez sa paghimo og imbestigasyon sa naulahi ug mokooperar sa imbestigasyon sa HPG-7 kabahin sa insidente.

Si Hernandez giingong apil sa gipasakaan og kasong carnapping uban nila ni Nixon Jumao-as kinsa usa ka ahente og sakyanan, Christian Dela Cruz, Ralph Catulong, Danilo Bataluna, Rey Cris Gonzaga, ug Marlon Lambojon.

Ang multicab ni Enopia gikawat samtang giparada gawas sa ilang balay niadtong Nobiyembre 21 sa Tabunok. (BANAT NEWS)