CEBU, Philippines - Patay ang usa ka lalaki human mabangil ang iyang ulo sa ligid sa gikasugat nga van dihang kalit nga natumba sa taliwala sa karsada ang giluwanan niya nga motorsiklo diha sa eskina Kagudoy sa atubangan sa Mactan Doctors Hospital sa barangay Basak, dakbayan sa Lapulapu alas-9 pasado ang takna sa buntag niadtong miaging adlaw.
Ang namatay mao si Miguel Apa Jumao-as, 59, taga barangay Gun-ob sa nahisgutang dakbayan samtang ang nakaligis kaniya mao si Rogelio Torralba, 36, taga sitio Mabugat sa barangay Tabok, dakbayan sa Mandaue kinsa gitanggong sa polis.
Si PO1 Alfredo Gabucan sa traffic section sa kapolisan sa maong dakbayan nga nahinabi sa Banat News miingon nga gikan sa barangay Marigondon ang biktima paingon sa barangay Poblacion sa dakbayan sa Lapulapu.
Sa paghidangat sa eskina Kagudoy sa barangay Basak sa maong dakbayan kalit kining mipabulho ug mi-overtake sa gisundang traysikol apan kalit nawagtangan sa iyang panimbang hangtod nga nalamba sa taliwala sa karsada.
Dugang pa ni Gabucan nga dihang natumba ang biktima mao usab ang pag-agi sa van type nga sakyanan nga gimaneho ni Torralba ug napasok ang ulo ni Jumao-as sa pangunahang ligid ug nabangil didto.
Si Torralba nga maoy nagmaneho sa nakaligis nga sakyanan uban sa pipila ka mga lumolupyo sa maong dapit dali nga midala sa biktima sa Mactan Doctors Hospital nga nahimutang sa maong dapit ug dali usab kining giatiman sa mga doktor sa maong tambalanan apan gideklarar kining dead on arrival. (BANAT NEWS)