Philpost molusad og postal money order

CEBU, Philippines - Nunot sa nagkamodernong panahon ug sa nagkagamay na sa kinitaang abot sa Philippine Postal Corporation molusad kini og ambisyosong programa aron mosulod sa kompetisyon sa mga pribadong money couriers sa nasud.

Ang director general sa PhilPost nga si Cesan Sarino, mibutyag nga karung umaabot buwan sa Abril sa sunod tuig ilang ilusad ang Postal Money Order sa publiko aduna nay kalahian sa naandang serbisyo sa Philpost nga gipasalig niyang paspas komparar sa mga pribadong money couriers.

Dugang pa ni Sarino, sukwahi sa mga pribadong money couriers ang Postal Money Order sa Philpost dili maningil og value added tax (VAT).

“We will give the public the same service that they get from those private money courier with the lower price and the speed,” pasabot pa ni Sarino.

Sama sa mga pribadong money couriers aduna say mga foreign partners nga kompanya sama sa mga bangko ang Postal Money Order.

Karung umaabot Abril maoy unang pagpahigayon sa testing sa maong proyekto gikan sa 200 ka piniling local postal areas nga gikonsiderar nga mga top earners ug usa niini mao ang Cebu.

Giangkon ni Sarino nga kaniadto pa gyud unta nila kini angayan gibuhat.

“This is because we did not do what we supposed to do before, that is why we are doing it,” matud pa ni Sarino.

Napanglantawan ni Sarino nga sa umaabot nga tuig dili na sila ang mangayo og kwarta sa gobiyerno ug nagplano silang sila na karoy motampo og pundo sa gobiyerno pinaagi sa makolektang bayad sa maong serbisyo.

“Instead of asking money from the government we will be giving money to the national government,” matud pa ni Sarino ug target nilang itunol ang labing unang tseke sa kitaon sa Philpost karong tuig 2014 kang Presidente Benigno Aquino III.

Gidugang ni Sarino nga sukwahi kaniadto nga dugay maabot ang mga suwat ngadto sa gipadalhan, gipaniguro na nila kining mahatud sulod lang sa tulo ka adlaw tungod sa bag-ong sistemang ilang giimplimentar.

Sa nanglabay’ng mga katuigan human mauso ang baratong texting tungod sa cellphones, bank-to-bank money transfers, pagkusog sa pribadong money transfers ug uban pang matang sa komunikasyon gawas sa tradisyonal nga suwat mihinay ug gilangaw ang Philpost.

Nadugangan pa kini sa mga reklamo kabahin sa kalangay pag-abot sa suwat, nangawagtang mga parcels, mga alegasyong pag-abli sa mga gipadala ug pagkuha sa mga importanteng butang sa sulod niini ug uban pa nakaapekto og dako sa pagsalig sa publiko sa Philpost. (BANATNEWS)