Mandaue adto na maglabay'g basura sa Consolacion
CEBU, Philippines - Nagsugod na sa paglabay sa ilang mga basura ang kagamhanan sa dakbayan sa Mandaue ngadto sa Asian Energy Corporation nga usa ka pribadong labayanan sa barangay Pulog sa lungsod sa Consolacion.
Si Mayor Jonas Cortes mipirma og kasabutan uban sa kadagkoan sa maong pribadong dumpsite.
Si Roberto Ranile sa habig sa kagamhanan sa maong dakbayan miingon nga gihingusgan na ang pagbahig sa mga basurang malata ug dili malata nga basura diha palang sa kabarangayan.
Gumikan kay ubos sa Memorandom of Agreement (MOA) sa Mandaue ug AEC, residual waste lang ang ilang itambak sa maong pribadong dumpsite.
Alang sa malungtarong kasigurohan nga adunay kalabayan og basura ang Mandaue gipaspasan karon sa siyudad nga makapatukod og kaugalingong Material Recovery Facilities (MRF) ang 27 ka barangay sa maong dakbayan.
Sa pagkakaron ang barangay Canduman ug barangay Pagsabungan mao pay adunay MRF isip mga pilot areas.
Si Atty. Benjamin Cabrido nga maoy environmental consultant ni Cortes miingon nga sukad nga gipatuman ang higpit nga waste segregation program mikunhod gyud ang basurang gilabay sa dumping area sa siyudad. (BANATNEWS)
- Latest
- Trending
