Giembargoha'g pump boat

CEBU, Philippines - Usa ka mananagat kinsa gikatahapang migamit og dinamita sa iyang pagpanagat diha sa kalawran sa barangay Pooc, dakbayan sa Talisay ang gigukod sa mga sakop sa Fisherman Sea and Ecological Care (FISECA) ug giembargohan sa mga gamit niini sa panagat kagahapon sa buntag.

Ang giembargohan mao si Bernardo Cañeda, taga barangay Tulay, lungsod sa Minglanilla giembargohan sa iyang pump boat, air compressor, upat ka pukot, antipara, plastic nga balde, kutsilyo, pliers, bugsay, plastic hose ug yapak (fins).

Si Gregorio dela Torre, hepe sa FISECA sa pakighinabi sa Banat News kagahapon nagkanayon nga nagpahigayon sila og coastal cleanup diha sa barangay Biasong dihang nakadawat sila og report kabahin sa mga mananagat nga migamit og dinamita diha sa Pooc.

Pipila ka gutlo sayo pa niana ang mga sakop ni dela Torre mipahibalong nakadungog sila og buto gikan sa Pooc maong ilaha kining gisusi ug ilang naabtan ang tulo ka pump boats nga nagdugok diha sa lawod. Dihang ilang giduol naglumba og padagan ang mga pump boat apan ilang nakit-an si Cañeda nga midunggo sa Tulay, Minglanilla maong ilaha kining gisundan ug mitawag sila og polis.

Si PO2 Wendyl Arañas, duty desk officer sa Minglanilla Police Station mibutyag sa Banat News nga si Cañeda mihimakak sa alegasyon ug nangangkon nga gikan siya sa Talisay ug mipauli aron mokaon apan kalit siyang gigukod ug gisikop sa FISECA.

Usa sa nakapalibog sa mga polis mao ang pangangkon ni Cañeda tungod kay nangangkon usab kini nga paingon pa siyang managat dihang mianha sa ilang balay ang mga sakop sa FISECA.

Si dela Torre miangkong lisod nilang makasuhan si Cañeda tungod kay wala silay nakuhang lig-on nga mga ebidensiya sama sa dinamita gikan kaniya. (BANATNEWS)