Monterazzas may pangontra na sa baha

CEBU, Philippines -  Gipahibalo kagahapon sa mga kadagkoan sa Monterazzas de Cebu nga ilaha nang nasunod ang mga rekisitos nga gipangayo sa siyudad sa Sugbo kalabot sa giisyu niining “cease and desist order” niadtong Hulyo.

Sumala pa ni Architect Augusto Villalon, presidente sa Genvi Development Corporation nga maoy developer sa maong subdivision nga nakabutang na sila og daghang mga water catchments ug detention ponds aron mohinay ang pagdagayday sa tubig kung mobunok ang uwan ngadto sa ubos.

Kahinumdoman nga gipasanginlan sa mga residente sa barangay Guadalupe ug sa katupad nga barangay nga ubos sa gihimutangan sa maong subdivision nga diha maggikan ang baha nga milunop kanila sayo niining tuiga hinungdan sa kamandoan sa dakbayan batok sa subdivision.

Dugang pa ni Villalon nga nakahimo na usab sila og lapad nga drainage system ug kining tanan ilang gipakita sa mga sakop sa media kagahapon.

Adunay 13 ka detention ponds ang natukod sa maong subdivision nga diin pundohan sa tubig baha nga hinay-hinayon pagpaawas paubos.

Mipasalig usab ang mga kadagkoan sa maong subdivision nga ilaha pa nga mapun-an ang mga water catchments sa ilang dapit.

Samtang si Mayor Michael Rama mipadayag nga iyaha pa nga susihon ang report sa Monterrazas.

 Ang executive director sa Cebu City Risk Reduction and Management Council (CCRRMC) nga si Alvin Santillana mosusi usab sa pangangkon sa Monterazzas ini na og moabot ang ting-ulan. Matud pa nga kung mogawas nga epektibo ang ilang gihimo anha pa sila morekomendar nga libkason ang “cease and desist order” sa pag-umad sa maong subdivision.

“Dili pa ta makasulti ana kung wagtangon ba ang “cease and desist order “ kay basin dunay kusog nga uwan unya mao gihapon ang mahitabo. Ato sa na i-check ,” sumala pa ni Santillana. (BANATNEWS)