Mitulis sa driver sikop

CEBU, Philippines - Usa sa tulo ka mga suspetsado nga mitulis sa usa ka drayber sa taksi niadtong Lunes sa kaadlawon sa sitio San Rafael, San Roque,   sa Talisay nasikop na sa kapolisan didto sa sitio Kilawan, barangay Tanke, dakbayan sa maong dakbayan kagahapon sa kaadlawon.

Ang nasikop nila ni SPO1 Mikie Espina, PO3 Almaquio Labitad ug PO2 Stephen Sefuesca mao si Lester Louie Macachor.

Si Espina mibutyag kagahapon sa mga tigbalita nga dihang nasikop nila si Macachor nakompirma nila nga “Lester Louie” diay ang ngalan niini sukwahi sa unang nahipos nilang report nga ang giingong ngalan sa suspetsado “Lexter Louie”.

Kahinumdoman nga si Macachor niadtong Marso 3, 2011 lang kini nakagawas gikan sa Talisay City Jail tungod sa kasong pagpanglabni.

Matud ni Espina nga adunay nakasulti kanila nga si Macachor miuli sa balay sa iyang amahan sa sitio Kilawan ug naatlan nila kini diha gawas sa balay sa ilang pagpahigayon og hot pursuit operation.

Hinuon matud sa mga polis nga si Macachor wala kini mopakita og pagsupak o pagsukol kanila dihang ila kining gisikop. Ang mga kauban ni Macachor sa pagpanulis mao si Ariel Paden kinsa giingong anak og tanod ug residente sa barangay Tanke ug usa ka giila lang sa ngalan nga “Homer”.

Matud ni Espina nga si Macachor sa ilang pagsukit-sukit mipasangil kini kang Paden nga maoy mipusil sa drayber nga si Jimmy Bacaro kinsa naigo kini sa walang apapangig ug ang bala milahos ngadto sa tuong apapangig.

Base sa report niadtong higayona nga ang gitulis nga si Bacaro giingong may pasaherong magtiayon nga giapil usab kuno og tulis sa mga suspetsado.

Ang kapolisan naghuwat sa nahisgutang duha ka mga biktima nga moanha sa ilang buhatan aron usab kini makapasaka og kaso batok sa mga suspetsado.

Si Espina nagkanayon nga nakadawat sila og report nga ang grupo ni Macachor giingong mga sakop pulos sa AKRHO fraternity apan ila pang susihon ang maong report.

Ang grupo usab ni Macachor maoy suspetsado sa mga tulis kansang mga biktima kasagaran mga drayber sa taksi. Ang kapolisan miawhag sa mga drayber sa taksi nga mga nabiktima sa tulis sa pagduaw sa ilang buhatan aron ilhon ang suspetsado kung mao ba usab ang mitulis kanila.

Si Macachor kinsa nagtingkagol na karon sa Talisay City detention cell mag-atubang sa kasong robbery with attempted homicide lakip na ang iyang duha ka kauban bisan kun wala pa kini mangasikop.

Sa laing bahin, si Macachor mao usab ang gitudlo ni Randay Matmat, 23, usa ka attendant/cashier sa Kyle Gas Station sa barangay San Isidro sa lungsod sa San Fernando nga mitulis kaniya uban sa wala hiilhing lalaki niadtong Lunes sa alas 9:40 sa gabii.

Si PO3 Marjuken Misuare sa San Fernando Police Station mibutyag nga ang nahisgutang tulisan nagsakay og usa ka motorsiklo ug nadala niini ang P17,000 nga halin ni Matmat.

Kagahapon sa alas 11:00 sa buntag si Matmat uban sa kapolisan sa San Fernando nga sila si PO2 Victor Cueno ug PO1 Miguel Bernabe mianha sa Talisay detention cell ug positibong giila ni Matmat si Macachor nga maoy mition kaniya og armas de fuego ug mikuha sa iyang halin. (BANAT NEWS)