Apektado sa gipasirhang sementeryo tabangan

CEBU, Philippines - Andam nga motabang si Governor Gwendolyn Garcia sa mga residente sa lungsod sa Daanbantayan nga apektado sa pagpasira sa 25 ka sementeryo sa maong lungsod.

Kini human ang pipila ka mga opisyales sa grupo nga misupak sa pagpasira sa maong mga sam-ang nakigtagbo sa gobernador didto sa buhatan niini niadtong miaging adlaw.

Si Alicia Diaz ang Parish Pastoral Secretary sa San Isidro Parish sa lungsod sa Daanbantayan nga si Gobernador Garcia mosuporta usab sa ilang pagsang-at og tukmang sumbong batok sa mga opisyales sa lungsod sa Daanbantayan nga maoy nangusog nga pasirad-an ang menteryohan sa ilang lungsod nga gipangulohan ni Mayor Maria Luisa Loot.

Matud ni Diaz nga alang kanila dili makiangayon ang kalit nga pagpasira sa tanang mga sam-ang sa ilang lungsod tungod lamang kay wala niini matuman ang pipila ka mga panginahanglan ilabina sa gipangayong sanitation permit.

Si Diaz miingon nga mas nasibot karon sila sa paghimo og legal nga lakang batok sa mayor sa ilang lungsod gumikan kay ilang natataw sa ilang tigum uban sa gobernador nga usa ka illegal ang maong   pagpatak-op sa mga sementeryo ug gipasagdan na lamang   ang ilang mga minatay nga ilang minahal sa kinabuhi nga malubong ngadto sa laing lungsod.

Midugang siya nga labi na nga gisuportahan sa gobernadora ang ilang tinguha nga magpadayon ang ilang paglubong sa ilang mga minatay ngadto sa ilang mga sam-ang samtang magpadayon ang paghikay sa mga gikinahanglang mga papeles aron makompleto ang tanang gipangayo alang sa operasyon niini. (Chester Abadilla/WC) (BANAT)