Wa ilhing babaye nadasmagan patay

CEBU, Philippines - Namatay diha-diha ang usa ka wala hiilhing babaye human mabunal ang ulo niini sa karsada kay nadasmagan sa naghaguros nga motorsiklo sa dalan national sa barangay Poblacion, lungsod sa Liloan sa miaging hapon.

Si SPO1 Claudio Castro Jr. sa kapolisan sa maong lungsod miiingon nga usa sa mga nakasaksi nga si Antonio Oliveros, 27, misumbong kanila nga ang nakadasmag sa biktima taga barangay Dapdap sa lungsod sa Compostela .

Dugang pa niya nga gikan pang nanaug    sa traysikol ang wala hiilhing   biktima dihang sa paglabang niini sa pikas daplin sa karsada gidasmagan sa kusog kaayong nagdagan nga motorsiklo.

Matud pa ni SPO1 Castro nga nalamba ang biktima sa sementadong karsada ug maayong pagkabagdok ang ulo niini hinungdan sa iyang kamatayon.

Gani gidali pa paghatod ngadto sa Danao District Hospital ang biktima diin didto kini ideklarar sa mga doktor nga patay na. Si SPO1 Castro miingon nga kasamtangan gipaabot nila ang mga kabanay sa biktima   nga maoy moila sa ngalan niini. Samtang gipangita pa nila ang motorsiklong nakadasmag sa maong biktima. (Romeo T. Limpangog/WC) (BANAT)