Namaligya og karneng iro pasirhan

CEBU, Philippines - Pasirad-an na sa dakbayan sa Bogo ang mga karenderya kon kan-anan nga nagbaligya og karne sa iro sa sunod semana.

Kini nunot sa higpit nga pagpatuman sa kampanya ni Governor Gwendolyn Garcia nga gitahas ngadto sa buhatan ni Dr. Mary Rose Vincoy ang hepe sa Cebu Provincial Veterinarian’s office.

Si Norma Lazo ang OIC City Agriculturist Officer sa dakbayan sa Bogo mitug-an ning maong kalamboan sa mga tigbalita ilabi na sa taga Sugbo TV atol sa gipahigayong tigom sa Cebu Provincial Veterinarian’s office sa miaging adlaw.

Matud pa niya nga karong sunod semana ila nang ipatuman ang closure order gikan sa administrador sa dakbayan sa Bogo batok sa mga kan-anan nga nagdalit pa og mga karne sa iro sa ilang mga kustomer.

Midugang pagpasabot si Lazo nga mipagawas na usab og kamandoan ang buhatan sa City Market Administrator sa Bogo nga gawas nga patak-opan ang malapasong karenderya, ikanselar   pa usab nila ang mga business permit niini sa panahon nga ilang masakpan nga nagdalit pa gihapon og sud-ang karne sa  iro ang maong kan-anan.

Gitug-an usab ni Lazo nga hugot usab karong gi-monitor sa ilang syudad kadtong mga tawo nga maoy manakop sa mga iro aron ibaligya ngadto sa kamerkadohan sa norte.(Chester Abadilla/WC) (BANAT)