Bus nawad-a'g preno walo angol

CEBU, Philippines - Napulo ka mga pasahero ang naangol dihang nawad-an sa preno ang bus pasaheroan nga ilang gisakyan ug midasmag   kini sa sementong koral sa usa ka balay didto sa Sitio Timbakol, barangay Putat lungsod sa Tuburan niadtong Martes sa alas 12:00 sa udto.

Ang nakasugat og disgrasya mao ang Ritchie Bus Liner nga gimaneho ni Rodulfo Bregoli, 43 , minyo, ug taga barangay Dakit lungsod sa Sogod.

Samtang ang mga na-angol nga pasahero mao sila si Jose Marie Temblon, taga Ibabao Estancia, Mandaue City, Merlisa Obod, taga barangay Cogon, Liloan, Ma. Malou-nie Gonzales, taga Ibabao, Estancia, Mandaue, Randolf Gonzales, taga Ibabao, Estancia, Mandaue, Romeo Limpiado, taga Daan Bantayan, Cebu, Virginia Limpiado, Daan Bantayan, Jushua Rizon, taga Sambag-1 syudad sa Sugbo, Cedric Giangan, taga Danao City, Bradley Tabutol taga siyudad sa Danao, ug Aurora Diola, 49, taga Timbakol, Tuburan .

Si PO1 Eric Diamante sa Tuburan Police Station mibutyag sa Banat News nga ang maong bus pasaheroan gikan sa siyudad sa Sugbo ug paingon sa Tuburan dihang pag-abot sa maong lugar kalit kining   nawad-an og preno.

Walay laing remedyo ang drayber gawas sa pagdasmag nalang sa pader aron mohunong ug nakapakanaog ang iyang mga pasahero nga igo lang nangabun-og apan walay nakabsan sa kinabuhi.

Kasagarang bun-og nga nahiagoman sa mga biktima mao ang ilang ulo gumikan sa pagkaparok nila sulod sa sakyanan

Ang mga biktima gihatud dayon ngadto sa Tuburan District Hospital, samtang ang drayber gibuhian lang dayon sa kapolisan human mipasalig ang tag-iya sa sakyanan nga silay moabaga sa mga galastohan sa pagpatambal sa mga biktima.(/WC)  (BANAT)