Pasko sa V. Rama gigahina'g P681 mil

CEBU, Philippines - Mokabat sa P681,000 ang gigahin sa siyudad sa Sugbo alang sa naandang programa matag Disyembre nga gitawag og Pasko sa V. Rama.

Kini gisalmotan sa tulo ka mga barangay nga naglangkob sa San Nicolas, Calamba ug Guadalupe.

Nagkanayon si Mayor Michael Rama nga sadya kaayo saksihan ang V. Rama kung magkaduol na ang Pasko sukad nga gipatuman ang maong programa gumikan kay mapuno kini sa mga dekorasyon partikular ang Belen.

Giingong usa kini ka kompetisyon ug sa hinapos nga bahin sa Disyembre himoon dayon ang final judging.

Ang project chairman nga si Gisela Palacios misaysay nga matag cluster tagaan nila og P5,000 isip seed money sa ilang mga entry.

Ang pinakahugyaw o labing nindot nga dekorasyon makadawat og P25,000 nga grand prize ug P2,500 usab ang consolation prize.

Mikabat na sa 21 ka cluster ang misalmot karong tuiga ug gitataw ni Palacios nga makita niini ang pagtinabangay sanglit ang mga tawo maghiusa sa pagbutang og dekorasyon sa ilang area.

Dugang pa ni Palacios nga nakigtambayayong sila karon sa mga opsiyales sa barangay sa tuyo nga adunay maka-roving nga mga tanod sa maong lugar matag karon ug unya aron malikayan ang mga pangawat ilabi na kung aduna silay mahalon nga dekorasyon nga iplastar.

Nagsugod na ang mga tawo sa nahisgutang barangay sa pagpaanindot sa ilang mga lugar gumikan kay himoon ang pre-judging sa unang semana sa Disyembre.(Sanden J. Anadia/WC) (BANAT)