CEBU, Philippines - Andam na ang tanan alang sa pagbukas sa bag-ong edipisyo sa Fuente Police Station sa unang semana sa Disyembre ning tuiga , sumala pa ni Mayor Michael Rama kagahapon ang maong building nga nagkantidad og P6 milyones hinatag sa Chong Hua Hospital ug sa Cebu Chamber of Commerce and Industry.
Sumala pa ni Rama nga nagkasabot na sila si Cebu City Police Office Director Melvin Ramon Buenafe kalabot sa iyang hangyo nga pahulipan og bag-ong mga polis ang nahisgutang presinto. Buot sa mayor nga makaangkon og bag-ong imahe ang maong police station kinsa nakasinati na og daghang isyu kaniadto.
Nalipay hinuon ang mayor gumikan kay may tulo na ka nominado si Buenafe aron pilian sa mahimong ihulip kang Senior Insp. Stanley Sabang , ang station commander sa maong presinto sukad relibohi si Chief Inspector Michael Bastes.
Sa pagkakaron padayon pang gitun-an kun kinsa niining tulo ka mga pilianang opisyal nga suwertihong idestino isip hepe sa Fuente Police Station.
Wala pa hinuon ibutyag ni Buenafe ang mga ngalan niini ngadto sa taga media. (BANAT NEWS)