Inahan giluba sa anak kritikal

CEBU, Philippines - Kritikal ang kahimtang sa usa ka inahan nga gidunggab og icepick sa iyang anak nga nalisoan sa pangisip didto sa sitio Portland sa barangay Kahumayan, dakbayan sa Danao alas 7:00 pasado ang takna kagahapon sa buntag.

Ang biktima kansang lawas nabulit sa mga samad mao si Teodora Vasquez, 46 , samtang ang midunggab kaniya mao ang iyang anak nga si Ruel Vasquez, 26 , ulitawo.

Si SPO2 Ildefonzo Prosia sa kapolisan sa maong dakbayan nga nahinabi sa Banat News miingon nga nag-andam sa ilang pamahaw ang biktima dihang kalit kining giduol sa suspetsado nga may giluklok sa hawak.

Ang biktima kinsa nangutana kun unsay giluklok sa hawak sa iyang anak gitubag lang sa naulahi og dunggab sa nagkalainlaing bahin sa lawas pinaagi sa ice pick niini.

Ang biktima gihatod dayon ngadto sa Danao District Hospital apan gibalhin kini sa Vicente Sotto Memorial Medical Center sa dakbayan sa Sugbo.

Samtang ang suspetsado kinsa giingong nalisoan sa maayong pangisip gibalhog usab dayon sa sulod sa bilanggoan sa maong dakbayan. (BANAT NEWS)