Biktima sa sunog pabalikon sa puwesto

CEBU, Philippines - Gibutyag ni Mayor Michael Rama kagahapon nga mahimo nang   makabalik pagpuyo sa ilang puwesto ang dul-an 100 ka pamilya sa Barangay Tejero nga naapektohan sa sunog niadtong Agosto ning tuiga.

Matud pa ni Rama nga nagkasabot na sila si Gobernador Gwendolyn Garcia bahin ning maong   luna nga puy-an og balik sa maong mga biktima nga iya sa kagamhanan sa lalawigan.

Ang maong lote may gidak-ong 6,000 metro kuwadrado sa bahin sa mga nasunogan, mibati sila og kahinangop niining pahibawo sa mayor kay nabalaka kaayo sila sa ilang kahimtang , basin dili na sila makabalik pa sa ilang tagsa-tagsa ka puwesto gumikan kay iya man sa probinsya ang maong luna.

Si barangay konsehal Garry Lao sa Tejero miingon nga gikalipay kaayo nila ang maong desisyon sa gobernador ug iyang giklaro nga nahisakop gyud sa Tejero ang maong dapit ug dili sa barangay Carreta, sukwahi sa migawas nga report nga adunay parte sa maong luna nga nahisakop sa Carreta.

Si Lao mipatawag na og emergency meeting kagabii sa iyang mga konstituwente aron tulin ang pagbalik sa mga biktima ngadto sa tagsa-tagsa nila nga puwesto. (BANAT NEWS)