3 papilian sa BLGF

CEBU, Philippines -  Tulo ka tawo ang girekomendar ni Mayor Michael Rama nga papilian aron usa niini maoy mahimong acting treasurer sa Siyudad sa Sugbo nga ihulip kang Tessie Camarillo.

Ang tulo naglangkob kanila ni kanhi city treasurer   Ofelia Oliva, kasamtangang assistant treasurer nga si Emma Villarete ug ang head sa Tax Mapping of Business Establishments Division nga si Juanita Monina Paires.

Si Rama mipadala na og suwat ngadto kang Presentacion Montesa, ang executive director sa nasudnong buhatan sa Bureau of Local Government Finance (BLGF).

Sa iyang suwat iyang gipahibawo ang hepe sa BLGF nga gusto niyang hulipan si Camarillo sa katungdanan tungod kay dili kini epektibo ug labaw sa tanan nawad-an na siya og pagsalig niini.

Apan ang BLGF kasamtangang mipabor kang Camarillo nga nakapalagot ni Rama hinungdan nga subli siyang mipadala og suwat ngadto sa maong ahensya uban sa pagrekomendar og tulo ka ngalan nga papilian niini.

Ang ngalan sa mga nominado, naggikan usab sa mga rekomendasyon sa mga opisyal sa buhatan sa mayor kinsa gituohan nila nga hain may mapilian sa BLGF niini kasaligan gyud sa pag-atiman sa buhatan sa panalapi sa siyudad.

Kini human molabang sa higpit nga interview ang nahisgotang mga nominado.

Si Oliva kinsa maoy kasamtangang financial adviser ni Rama maoy nag-una sa listahan tungod kay nasaksihan ni Rama ang abilidad ni Oliva niadtong kini pay city treasurer ning dakbayan. (BANAT NEWS)