Dunay polis sa CPPO nga 'drug protectors'

CEBU, Philippines - Giangkon ni Sr. Supt. Patrocinio Comendador, hepe sa Cebu Provincial Police Office (CPPO) nga dili lang pipila ka mga pulis sa dakbayan sa Sugbu ang nalambigit sa ilegal nga drugas sanglit aduna say pipila niya ka sakop sa probinsya ang nalambigit niini.

Matud pa ni Comendador nga iyaha na silang gi-monitor karun ilabi na niadtong gikatahong nalambigit sa ilegal nga kalihokan apan nagdumili siya pagtug-an sa mga pangan niini.

Si Comendador mibahad nga imbestigahon ug pasakaan og kaso ang maong mga pulis.

“Intelligence information on how many are they and who they are remain confidential but we have to be careful in filing charges and look for concrete evidence,” sumala niya nga daw nagpasabot nga nakaila na siya kanila ug sa nagkadaiyang modus operandi sa maong mga polis.

Gidugang niya nga dili na siya magduha-duha pa sa iyang mga personnel kun iya kining masakpang ‘protector’ sa mga drug pushers o kaha tiggamitan og ilegal nga drugas nga shabu.

Sa miaging semana, tulo ka pulis nga sakop sa Cebu City Police Office (CCPO) ang gipasanginlang protektor og mga drug lords diha sa barangay Duljo Fatima ning siyudad ang gipalabay sa Mindanao.

Ang tulo ka mga pulis sumala pa nakit-an gyung mokuyog sa mga drug lords sa mga kalihukan niini, apan ang maong mga polis sa pasiunang report giingong hugtanong nanghimakak sa pasangil.

Si Comendador sa iyang bahin nagkanayon nga kining maong mga pulis nga nalambigit nagkinahanglan gyud og kwarta.

“Ang mo-handle sa investigation kung dunay involved nga drugs kadto gyu’ng dunay clean heart and mind,” matud niya.

Niadtong Septiyembre,duha ka pulis nga nadestino sa lungsod sa Asturias ug Tuburan nag-atubang na karun og kasong grave misconduct human nasuta nga tiggamitan og ginadiling drugas. (BANAT NEWS)