Trabahador natagak sa 2nd floor patay

CEBU, Philippines - Patay ang usa ka construction worker human natagak gikan sa ikaduhang andana sa gitukod nilang panimalay nga mao sad iyang gikatulgan diha sa barangay Gun-ob, dakbayan sa Lapulapu alas-3 pasado ang takna sa miaging kaadlawon.

Ang namatay mao si Gabino Angeles, 35, lumad nga taga lungsod sa Clarin sa lalawigan sa Bohol ug trabahante sa gitukod nga balay sa barangay Gun-ob sa maong dakbayan.

Si SPO1 Allan Pantaleon sa Homicide Section sa kapolisan sa maong dakbayan nga nahinabi sa Banat News miingon nga nakadawat sila og tawag nga nagpahibalong may construction worker nga natagak ug namatay.

Matud pa ni Pantaleon nga si Antonio Sales nga kauban ni Angeles mitug-an kanila nga nahipugwat na lamang sila gikan sa pagkatulog dihang kalit nga may milagubo.

Dihang ilang gisusi ilang nakita ang biktima nga mibanaw na ang dugo samtang nagbuy-od sa ubos. Nasayran nga diha natulog si Angeles sa ikaduhang andana nianang pagkagabii.

Nagtuo silang gialimungawan si Angeles ug mibangon ug milakaw nga wala sa kaugalingon hinungdan nga natagak ngadto sa ubos nga bahin nga gibanabanang napulo ka tiil ang gihabugon. Si Pantaleon miingon nga base sa dugang impormasyong ilang nakuha nakainom og ilimnong makahubog si Angeles uban sa mga trabahante sayo sa miaging gabii. (BANAT NEWS)