2 polis gi-ambush usa angol

CEBU, Philippines - Naangol ang usa sa duha ka mga polis nga nagpatrolya human gi-ambusan sa wala pa matinong gidaghanon sa mga armadong lalaki diha sa bukirang bahin sa barangay Saragosa sa lungsod sa Aloguinsan niadtong Lunes sa alas 11:30 sa gabii.

Ang biktima sa pagpang-ambush ug swerteng nakalingkawas mao sila si PO2 Demetrio Guzman, ug PO1 Sanny Solomon, pulos nadestino sa maong lungsod.

Ang duha luwan sa usa ka motorsiklo sa ilang pagpatrolya nga gimaneho ni Solomon ug padulong na unta sila mamalik sa presinto dihang kalit nga girakrakan sa mga armadong lalaki.

Si Guzman lang maoy naigo sa tuong bahin sa bagtak tungod kay dali silang nakabawos ug nakapabuto og balik tumong sa mga lugar diin gituohan nilang nagpahipi ang mga namanhig kanila.

Matud ni Insp. Jaime Tolentino, hepe sa Aloguinsan Police dihang nahinabi sa Banat News, ang duha ka polis nag- surveillance sa bukirang barangay batok sa mga kalihukan sa negosyo sa gidiling drugas sa maong mga lugar nianang tungora.

Sumala pa ni Tolentino diha na sa barangay Saragosa ang duha ug iyang gimandoan pinaagi sa text nga pabalikon sa presinto sanglit aduna silay lakton.

Samtang luwan sa motorsiklo padulong sa presinto nakamatikod ang duha sa usa ka motorsiklong adunay mga lalaking nagsakay nga nagpunay og sunod kanila.

Pag-abot sa mingaw nga lugar ug distansya sa mga panimalay mipakapaka dayun ang butobuto sa armas. Bisan naunhan daling nakabunot sa ilang mga armas ang duha ug mibawos og pusil sa direksyon diin naggikan ang buto.

Matud pa nga nabungkag ang plano sa mga gikatahapan kinsa daling miikyas, napugngan lang ang paggukod sa duha ngadto sa mga gikatahapan tungod sa samad nga naangkon ni Guzman.

Dali silang mibalik sa police station ug gihatud dayun sa tambalanan dinhi sa dakbayan sa Sugbo si Guzman alang sa tukmang medikasyon samtang gilusad dayon ang followup operation batok sa mga namanhig apan napakyas sila pagsikop kanila.

Gituohan ni Tolentino nga panimawos kadto sa mga responsable sa illegal activities sa maong lungsod nga maoy naligsan karun sa ilang subsob nga kampanya batok sa ginadiling drugas. – EIM (BANAT NEWS)