Pia mihatag P3M kang Rama

CEBU, Philippines -  Pormal na nga gitunol kagahapon ang tseke nga P3 milyones gikan sa buhatan ni Senador Pia Cayetano ngadto kang Mayor Michael Rama aron ihinabang sa Cebu City Medical Center sa pagpaayo sa pipila ka bahin sa maong tambalanan.

Ang liaison officer ni Cayetano nga si Rey Martinez maoy nagtunol sa tseke ngadto kang Rama ug mapasalamaton ang mayor ngadto sa senador gumikan kay gigahinan gyud niini ang CCMC.

Samtang nagplano usab karon ang mayor nga mopadala og suwat ngadto sa igsuon ni Pia nga si Senador Allan Cayetano aron mo-request na usab og dugang hinabang sa pagpalambo sa CCMC.

Si Martinez mipadayag nga gawas sa CCMC, nakahatag na usab sila og hinabang ngadto sa Vicente Sotto Memorial Medical Center.

Si Mayor Rama nagkanayon nga importante kaayo ang pag-atiman sa mga programa alang sa panglawas.

Sumala pa niya nga hapsay usab ang ikahatag nga serbisyo sa katawhan kun adunay lapad nga pasilidad ang usa ka tambalanan.

Nagkanayon si Rama nga kun motabang lang ang mga nasudnong opisyal sa mga local government unit seguradong daghan usab   ang mga konstituwente ang maserbisyohan.

Dili pa lang dugay, ang buhatan ni Cayetano miapod-apod og medicine allowance alang sa mga 100 nga piniling senior citizen sa dakbayan sa Sugbo. (BANATNEWS)