Mr 'X' nalumos sa dagat

CEBU, Philippines - Usa ka lalaki nga wala hiilhi naglutaw-lutaw nga patay na sa dagat dapit sa Gate 1 Exit sa South Road Properties (SRP) sa barangay Sto. Niño ning dakbayan sa Sugbo kagahapon sa udto.

Ang patay’ng lawas nga gitawag lang nga “Mr. X” kinsa gituohang nalumos gibana-banang may 40-anyos kapin ang edad, nagsul-ob og short nga maong, mubo og buhok apan may pagka kulongon, yapison ang lawas niini, nga wala nay senina nga nagkaob samtang naglutaw-lutaw sa dagat. Hinuon may nakit-an nga sweat shirt nga dekolor nga gituohang maoy gisul-ob niini apan nabuwag na sa iyang lawas dili layo sa iyang nahimutangan dihang napalgan kini.

Si Maximo Canque nagbantay sa exit sa SRP nga nahinabi sa Banat News nagkanayon nga pasado alas 10:00 sa buntag kagahapon iya pang nakit-an ang biktima nga naglingkod daplin sa dagat ug iya kining gibadlong nga papahawaon kay nagkaanam og dako ang dagat apan wala mopatuo kaniya.

Sa pasado alas-12:00 sa udto iya nang nakit-an ang biktima nga nagkaob nga naglutaw-lutaw na sa dagat hinungdan nga iya kining giguyod paingon sa daplin ug iyang gisugo ang iyang kauban nga manawag og polis.

Matud ni Canque nga pirme niyang makit-an ang biktima buntag ug hapon nga moagi diha sa SRP ug nagtuo siyang may deperensya ang pangisip niini.

Si Canque miingon nga posibling giataki o kaha naligo lang ang biktima sa dagat sa dihang nagsugod na og taob kagahapon sa alas-10:00 sa buntag. Si PO2 Julius Regis ug PO3 Julius Mabunay sa Homicide Section nga maoy naghimo og pakisusi sa patay’ng lawas sa biktima mipamatuod nga walay samad sa lawas ang biktima.(WC) (BANATNEWS)