P20M ekipo gipalit sa Mandaue

CEBU, Philippines -  Aron matuman ang mga proyektong pang-imprastraktura sa dakbayan sa Mandaue mipalit ang dakbayan og balor P20 milyones alang sa pagpamalit og mga heavy equipment.

Si Arcenio Longakit nga maoy sales representative sa Civic Merchant sa iyang pamahayag miingon nga mokabat sa P11.8 milyones ang Grader nga gipalit sa kagamhanan sa dakbayan.

Samtang ang backhoe loader nagkantidad og P7.7 milyones ug direktang napalit gikan mismo sa pabrika sa Volvo sa Estados Unidos.

Si Mayor Jonas Cortes miingon nga ilang gipaniguro ang kalig-on sa maong mga ekipo aron gamiton sa ilang mga proyekto ilabi na sa problema sa baha ug sa mga baradong kanal.

Kahinumdoman nga niadtong miaging bulan si Cortes namalit usab og mga ekipo nga magamit sa panahon sa mahitabong katalagman nga sama sa pagbaha nga gigastuhan og kapin sa P20 milyones nga naglangkob sa mga rubber boats ug uban pa. (BANAT NEWS)