Nagpusil sa ulo

CEBU, Philippines -  Gidudahang nagpusil sa iyang ulo ang pag-umangkon sa kanhi bise mayor sa Cordova kinsa dakpon unta sa mga polis sa dakbayan sa Sugbo sa miaging gabii tungod sa pagpusil-patay niini sa bag-ong hinigugma sa iyang kanhi uyab diha sa Nasipit, Talamban, dakbayan sa Sugbo.

Si PO2 Manfred Maarat sa Cordova Police Station miila sa giingong nagpusil sa ulo mao si Allan Sinugbohan, 30. Si Sinugbohan matud pa ni Maarat usa ka professor sa Cebu Normal University apan wala pa makompirmar sa Banat News ang maong impormasyon sa maong unibersidad.

Matud pa ni Maarat nga nag-hot pursuit operation ang mga sakop sa kapolisan sa Cebu City Police Office (CCPO) nga gipangulohan ni SPO4 Alex Dacua sa maong dapit batok kang Sinugbohan dihang kini giingong nagpusil sa iyang ulo.

Si Sinugbohan maoy gitumbok nga suspek sa pagpusil kang Archie Ygot, 27, sa Nasipit, Talamban sa dakbayan sa Sugbo pipila ka oras sa wala pa kini maghikog diha sa barangay Gabi sa Cordova. Dugang pa ni Maarat nga kuyog ni Dacua ang pipila ka sakop sa kapolisan sa lungsod sa Cordova sa pag-adto ang panimalay ni Sinugbohan sa barangay Gabi.

Apan gikatahong nakabantay si Sinugbohan sa pag-abot sa mga polis ug midagan sa luyo sa ilang panimalay ug didto ilaha nalang nabati ang lanog nga buto sa armas.

Dali gisusi sa mga polis ang luyo sa balay ug ilang napalgan si Sinugbohan nga wala nay panimuot ug nagkadugo sa ulo. Usa ka kalibre .357 nga armas ang nakuha diha sa tupad niini.

Ang mga kabanay ni Sinugbohan midala kaniya sa Mactan Doctors Hospital ug padayon pang giatiman sa mga doktor kinsa giingong anaa sa talandugong kahimtang atol ning pagsulat sa balita.

Si SPO3 Alejandro Sarvida sa Talamban Police Station nga nahinabi sa Banat News miingon nga sayo sa maong gabii, si Ygot namisita sa boarding house ni Daisybeth Climaco, 21, sa Nasipit, Talamban sa dakbayan sa Sugbo.

Si Climaco giingong kanhi hinigugma ni Sinugbohan.

Sa paggawas ni Ygot gikan sa boarding house ni Climaco kalit lamang milanog ang buto sa armas ug dihang gisusi ni Climaco nakita niya ang uyab nga nagbuy-od na nga nagkadugo.

Sumala nga adunay mga namuyo sa maong boarding house ang nakakita kang Sinugbohan nga maoy mipusil kang Ygot apan dali kining miikyas. Dali nga gidala si Ygot sa Vicente Gullas Memorial Hospital sa barangay Banilad apan gideklarar kini sa mga doktor nga dead on arrival.

Sa pakighinabi sa Banat News ni PO3 Edario Manatad sa Homicide Section sa Cebu City Police Office si Sinugbohan buot usab untang mamisita kang Climaco nianang orasa tungod kay nagdala man kini og buwak.

Apan posibleng nasagmuyo si Sinugbohan sa diha nga iyang nakita nga ang iyang kanhi hinigugma aduna nay laing ka-estorya sulod sa ilang panimalay.

Matud pang Manatad posibleng gipaabot niini si Ygot nga mogawas ug sa paggawas sa naulahi gipusil kini ni Sinugbohan.

Sumala pang Manatad dihang ilang giadto sa balay niini si Sinugbohan gipasulod pa sila sa mga ginikanan niini apan dihang gitawag na kini nakadungog nalang sila og buto gikan sa luyo sa balay.

“Didto mi sa ilaha, unya sa diha nga gipasulod mi sa iyang (Sinogbuhan) mama ug gitawag siya nakuyawan mi kay kalit lang nga naay mibuto, unya sa pagtan-aw namo nagkadugo naman siya mao ‘to gidali pud namo og dala sa Mactan Doctors Hospital,” saysay pa ni Manatad.

Gisubay karun sa kapolisan mao ang anggulo nga love triangle tungod kay upat na ka tuig nga manag-uyab si Sinugbohan ug si Climaco samtang si Ygot buwan palang kini nga nakigsuod ni            Climaco.

Si Maarat nagkanayon nga base sa nadawat nilang impormasyon si Sinugbohan nakabsan sa kinabuhi kagahapon sa udto, ang information desk sa Mactan Doctor’s Hospital mikompirmar usab nga nakabsan kini sa kinabuhi alas-12:48 sa udto. Uban sa report ni Lesley Caminade/EIM (BANAT NEWS)