Notadong pusher sikop sa Cordova
CEBU, Philippines - Nasikop sa kapulisan ang notadong mamaligyaay og ginadiling drugas sa lungsod sa Cordova diha sa barangay Bangbang Cordova niadtong Biyernes sa alas 4:20 sa hapon.
Ang nasikop mao si Carlos Tajanlanghit, 50, molupyo sa maong lugar human masakmiti og walo ka gagmay’ng plastik nga paketeng dunay gituohang sulod nga shabu.
Matud ni SPO1 Laurencio Wagwag sa Cordova Police Station dihang nahinabi sa Banat News ang grupo sa nagpatrolyang sila si PO2 Charlie Valmoria nakaakto sa suspek nga mitunol og gamay nga plastic sa duha ka lalaki.
Tungod sa kadudahang lihok sa transaksyon daling giduol sa mga polis ang tulo apan ang duha niya ka gidudahang kustomer nakabantay ug mikaratel og dagan.
Ang suspek kinsa wala dayon makamatikod sa mga polis daling nakuptan ug dihang girekisa una kining nakuhaan og duha ka pakete nga dunay sulod nga gituohang shabu.
Apan sa makuting pagrekisa kaniya sa mga polis nakuhaan pa kini og dugang usa ka plastic diha sa iyang bulsa nga dihang giablihan duna kini laing unom ka mas gagmay’ng pakete sa gituohang shabu.
Gitumbok nga ang suspek dili pa kaayo kini dugay nga mamaligya og gidiling drugas sa maong lugar butang nga hugtanon usab nga gihimakak sa suspek. (BANATNEWS)
- Latest
- Trending
