Doling ug si gobernador Gwen mao ra ba?

CEBU, Philippines - Ang artikulo nga sinuwat ni broadcaster-newspaper columnist Leo Lastimosa nga “Si Doling Kawatan” pipila niini mipamatuod nga referedo kini kang Governor Gwendolyn Garcia .

Kini mao ang testimoniya sa kolumnistang si manlalaban Pachico Seares atol sa gipahigayong hearing kagahapon sa kasong libelo ni Lastimosa sa buhatan ni Regional Trial Court Branch 14 Judge Rafael Yrastorza.

Si Seares mikompirmar nga iya ang kolum nga Who is Doling nga gipagawas sa Sun Star niadtong buwan sa Hulyo tuig 2007.

Atol sa cross examination nga gihimo ni manlalaban Celso Espinosa kang Seares, gibutyag sa naulahi nga sa 15 niya ka mga tinun-an sa University of the Philippines   sa kursong Mass Communication iyang gipabasa sa artikulo.

Matud pa ni Seares, nga siyam niini ang miila nga ang gitumbok sa maong artikulo nga Si Doling mao gayud si Garcia, samtang ang lima niini wala masayud kun si kinsa ang gitumbok nga Doling.

Midugang si Seares nga ang writer migamit og allegory uban ang demonstrative form of representation pinaagi sa mga simbolo o figure aron ipasabot ang usa ka butang o estorya.

Si Lastimosa   nga gisuportahan sa mga sakop sa media mibutyag nga ang gipakitang suporta sa maong grupo kaniya usa niya ka garbo isip sakop sa Media.

Midugang usab si Lastimosa nga ang essential element sa Libel mao ang pag-ila sa biktima.

“The identity of the victim must be firmly established and this character named Doling described in the column was not identifiable,” pasabot pa ni Lastimosa.

Kahinumdoman nga si Garcia mipasaka og kasong libelo tungod sa kolum ni Lastimosa sa The Freeman nga Si Doling Kawatan. Ang maong kolum naghisgot kalabot sa mga iregularidad sa pagtukod sa Cebu International Convention Center (CICC). (BANATNEWS)