Soc di motugot terminal buksan

CEBU, Philippines - Si Mayor Socrates Fernandez sa dakbayan sa Talisay dili manghilabot sa trabaho sa traffic division sa siyudad uban sa pagpasabot nga dili siya motugot nga buksan pag-usab ang daang terminal sa kanhi merkado publiko sa barangay Tabunok.

Gipadayag ni Fernandez nga dili siya mag-apil-apil sa function sa traffic division ug dili usab siya manghilabot sa mga gimbuhaton sa City of Talisay Traffic Operation Development Authority (CT-TODA).

Si Fernandez miluwat sa maong pamahayag human si Konsehal Danny Caballero mipasalig sa mga drayber sa traysikol nga kung ibasura gihapon sa konseho sa siyudad ang ipasar nga resolusyon ni Konsehal Val Ylanan bahin sa temporaryong pagpaabli sa karaang terminal, adto sila manghangyo sa mayor sa maong katuyoan.

Si Ylanan ug Caballero pulos mga miyembro sa oposisyon nga kampo sa konseho sa Talisay.

Apan ang mayor mikompirmar nga ibasura niya ang maong hangyo tungod kay ubos kini sa pag-atiman sa CT-TODA ang maong problema.

Atol sa gipahigayong regular session sa konseho niadtong Martes, wala hatagi og gibug-aton sa konseho ang   resolusyon nga gipangamahanan ni Ylanan.

Si Ylanan ang gikatakdang moduso pag-usab sa iyang resolusyon sa sunod semana, nanghinaot nga maaprobahan kini sa iyang kaubanan isip pinaskohan sa mga drayber sa traysikol.

Human sa nahisgutang sesyon niadtong Martes, si Caballero nakig-estorya sa mga drayber sa traysikol ug mipasalig nga ipadangat nila ang maong hangyo ngadto sa mayor kung dili gyud aprobahan sa sunod semana ang resolusyon ni Ylanan.

Matud ni Caballero nga ang mayor mahimo kining makaluwat og executive order aron mabuksan pag-usab ang daang terminal.

Kahinumdoman nga ang task force Alpha nga gipangunahan   sa CT-TODA ug kapolisan nagpahigayon og operasyon batok sa mga traysikol nga magpundo sa ilawom sa flyover sa Tabunok.

Ang maong mga traysikol nakapahuot sa maong lugar ug nagbutang sa mga pedestrian sa dakong risgo nga kahimtang.

Giimplementar sa task force Alpha ang balaod nga nasudnon nga wala magtugot sa unsa mang matang sa sakyanan nga magpundo sa mga national highway, sama sa barangay Tabunok. (BANATNEWS)