Bayot mihulgang mo-upload sa hubo nga picture sa FB gidakop

CEBU, Philippines - Gidakop sa kapulisan ang usa ka mahuyang human giingong mihulga sa usa ka 19-anyos nga lalaking American national nga i-post ang hubo niining hulagway diha sa social networking facebook kung dili makigbalik kaniya.

Ang pagdakop nahitabo niadtong Huwebes sa gabii diha sa Mango Square ning siyudad sa Sugbu batok kang Valdimir Tirol Silao, 21, lumad nga taga lungsod sa Buenavista sa lalawigan sa Bohol.

Ang mga sakop sa Investigation and Detective Management Branch (IDMB) sa Cebu City Police Office (CCPO) midakop kaniya human ang usa ka 19-anyos nga Amerkano ang miduol kanila ug nagpatabang bahin sa hulga kaniya sa suspek.

Ang biktima mitug-an sa mga tigbalita nga nagtuo gyud siyang babaye si Silao nga nagpailang Collin Garcia diha sa facebook, unom na ka buwan ang nakalabay.

Nagkasuod sila sa usa’g-usa hangtud nga nakauyab silang duha apan wala siya masayod nga bayot diay ug dili tinuod nga babaye si Silao.

Giangkon usab sa biktima nga tigpadalahan siya og hubo niyang mga litrato ngadto kang Silao alyas Collin.

Apan sa dihang iyang nahibaw-an sa biktima ang tinuod nga pagkatawo ni Silao nga usa kini ka mahuyang hinay-hinay nga mipalayo ang langyaw sa suspek apan gihulga na hinuon siya niini.

Nagduda ang biktima nga posibleng nagtuo ang suspek nga nahigugma gyud siya niini og maayo maong gihulgang i-expose ang iyang hulagway.

Apan si Silao midepensa nga iyahang gihulga ang langyaw tungod kay wala iuli niini ang cellphone sa iyang inahan gihuwaman niini nga gusto niyang bawion.

Giangkon sa suspek nga migamit siya og ngan nga Collin Garcia kay dunay higayon nga ang biktima mopadala kaniya og messages nga nahigugma kini kaniya bisan kun usa siya ka mahuyang.

Si Silao anaa karun gitanggong sa detention cell sa CCPO samtang gipaabot nga pasakaan siya og tukmang kaso sa kapulisan.(/EIM) (BANATNEWS)