Warrant of Arrest vs GMA

CEBU, Philippines - Migawas na ang usa ka warrant of arrest batok kang kanhi presidente ug karon Kongresista Gloria Macapagal Arroyo gikan sa Pasay City regional trial court kalabot sa kasong gipasaka sa Commission on Elections nga ‘electoral sabotage.’

Gawas kang Arroyo laing duha ka opisyal nga nalutsan gihapon sa susamang warrant of arrest nga giisyu ni RTC Branch 112 Judge Jesus Mupas nga mao sila si kanhi Maguindanao Gov. Andal Ampatuan Sr. ug kanhi Maguindanao election supervisor Lintang Bedol sumala pa sa report sa GMA News TVs Quick Response Team.

Sumala pa sa maong report nga ang kasong susama niini kung lig-on ang ebidensya non-bailable kini nga salaod.

Ang maong warrant of arrest migawas tulo ka adlaw human gibabagan sa mga sakop sa Bureau of Immigration subay sa kamandoan sa kalihim sa Department of Justice nga si Leila De Lima ang pagsuway og biyahe ni Arroyo ug banang si Mike gawas sa nasud.

Ang mga Arroyo nakakuha og temporary restraining order gikan sa Korte Suprema batok sa gipagawas nga hold-departure orders kanila sa DOJ tungod sa mga kasong gikatakdang isang-at batok kanila.

Ang kampo sa mga Arroyo pinaagi sa ilang tigpamaba nga si Raul Lambino sa radio dzBB report mihulagway sa paggawas sa maong warrant of arrest nga susama gikusgon sa "bullet train." Sa usa ka press briefing sa Malacañang, si Justice Secretary Leila de Lima miingon nga dili nila babagan kung magpa-hospital arrest si Arroyo.

Matud pa ni De Lima nga gimandoan siya ni Presidente Benigno Aquino III kinsa mitambong sa 19th ASEAN Summit sa Bali, Indonesia nga ayuhon og tratar ang kanhi presidente sa nasud. Si Arroyo kasamtangang anaa sa St. Luke's Medical Center sa Taguig City. (BANATNEWS)