6 tinun-an sa MCC nakapasar sa LET

CEBU, Philippines - Unom sa 20 ka mga tinun-an sa Mandaue City College (MCC) sa Tipolo campus nga gidumala ni Dr. Paulus Marie Cañete nakapasar sa Licensing Examination for Teacher (LET) nga gihimo sa Professional Regulation Commission (PRC) 7 nga gipahigayon niadtong Septiyembre 25 niining tuiga.

Si Dr. Cañete nga nahinabi sa Banat News miila sa mga nakapasar nilang mga tinun-an nga mao sila si Cristine Castro, Fe Marie Lauron, Russel Martin Fullozos, Gerald Suazo ug Cheryl Augusto.

Matud pa ni Cañete nga bisan kun adunay wala magmalampuson nga ilang tinun-an sa maong pasulit apan sa gihapon iyang gikalipay ang gidaghanon sa mga tinun-an nga nakapasar sanglit maisip man nga taas kini nga porsiyento sa gipangayo sa PRC nga 20 porsiyento nga makapasar sa maong pasulit.

Giangkon ni Cañete nga nakahatag gyud og dakong epekto sa ilang mga tinun-an ang nasinating kasamok sa ilang operasyon karon. Ang maong tunghaan wala ilha sa konseho sa dakbayan sa Mandaue ug nagtukod hinuon og susamang City College ang dakbayan.

Gawas sa wala pag-ila kanila sa Konseho, gidid-an usab sila sa PRC nga makakuha og pasulit sa LET ang ilang mga graduates ug sa samang higayon wala sila ilha sa Commission on Higher Educatiion (CHED).

Apan ang korte mipagawas og temporary restraining order human mopetisyon ang mga tinun-an hinungdan nga nakakuha sila og pasulit. (BANATNEWS)