Operasyon vs traysikol sa tabunok nagubot

CEBU, Philippines - Usa ka traffic enforcer sa dakbayan sa Talisay ang gipasanginlang nangulata og drayber sa traysikad atol sa kagubot kagahapon sa buntag diha sa barangay Tabunok.

Ang maong insidente nahitabo samtang nagpahigayon og operasyon ang Task Force Alpha sa Land Transportation Office (LTO) batok sa mga traysikol nga magpundo diha ilawom sa flyover sa Tabunok nga giabagan sa kapolisan ug City of Talisay Traffic Operation Development Authority (CT-TODA).

Ang nahisgutang enforcer mao si Sherwin Abaquita ug ang drayber sa traysikad mao si Victor Meloren, 21, taga barangay Lagtang sa nahisgutang siyudad kinsa giingong misuway og ilog og armas sa usa ka gwardiya aron pusilon si Abaquita.

Si Meloren nga nahinabi kagahapon sa Banat News nagkanayon nga nagparada siya dihang giduol siya ni Abaquita ug gipapahawa ug dihang padulong na siya mobiya gikatahong gibunlot siya niini ug gikulata.

Giangkon ni Meloren nga misuway siya og ilog sa armas sa gwardiyang si Jake Urdaneta nga nagbantay sa gisirad-ang merkado sa Tabunok aron mobawos kang Abaquita.

Si Urdaneta mibutyag sa Banat News nga gidala si Meloren sa usa ka traffic enforcer diha sulod sa siradong merkado samtang nagpaabot sa police patrol car aron dalhon kini ngadto sa police station.

Matud pa niini nga ang duha nagpunay og lalis maong iyahang giuwang apan gisuwayan og ilog ni Meloren ang iyang service firearm sa iyang hawak hinungdan nga gilubag niya ang kamot niini.

Si Tronando Lastimosa, vice chairman sa CT-TODA sa pakighinabi niini sa Banat News kagahapon kinsa diha usab sa maong operasyon nagkanayon nga nakabati siya ni Meloren nga nanghagad og sumbagay kang Abaquita human badlunga sa naulahi.

Tungod niini iyang gimandoan si Abaquita nga dad-on sa ilang buhatan sa traffic division si Meloren apan matud pa midagan kini ug misuway og punit og kutsilyo sa tindahan og manok.

Ang hepe sa mga traffic enforcers nga si Gerard Lariego daling mipakgang kang Meloren ug gipasidan-ang dili ihinayon iyang plano ug diha pa kini mopatuo ug mikuyog ngadto sa karaang merkado samtang nagpaabot sa patrol car.

Si Lastimosa nagkanayon nga pasakaan nila og kasong direct assault si Meloren kinsa nagtingkagol na sa Talisay City detention cell.(/EIM) (BANATNEWS)