Kinawat gisulod sa kinatawo

CEBU, Philippines - Wala gihapon makalingkawas ang usa ka 39-anyos nga katabang nga mitago sa giingong iyang kinawat nga mga alahas sa sulod sa iyang kinatawo human sa makuting pagsukit-sukit sa kapolisan atol sa iyang pagkasikop.

 Dul-an sa usa ka gatus ka libo ka pesos ang balor sa mga bulawan nga alahas ang na-recover sa kapulisan gikan sa maong katabang nga si Vilma Singson Aying, 39, diha sa pansayan sa Consolacion Police Station niadtong Miyerkules sa alas 9:30 sa buntag.

Si Aying nga taga lungsod sa Carmen gireklamo sa iyang mga agalon nga sila si Nestor ug Librada Francisco, molupyo sa Windfields Subdivision barangay Danlag, Consolacion.

Matud ni PO2 Jonaskie Romero, desk officer sa Consolacion Police Station dihang nahinabi sa Banat News ang mga nahanaw nga alahas nga gikuha sa suspek mao ang duha ka gold necklace nga dunay pendant nga mokantidad og P36 mil, usa ka gold ring adunay frog design mokantidad og P24 mil, usa ka gold birdstone ring mokantidad og P30 mil, usa ka paresang gold earings mokantidad og P18 mil ug usa ka gold bracelet mokantidad og P16 mil.

Gibutyag sa biktima nga si Librada dihang nahinabi sa Banat News pinaagi sa telepono mga alas 8:00 sa buntag samtang iyang giatiman ang pagkaon sa iyang bana ug anak gisugo niya ang suspek pagpanglimpyo sa ilang kwarto.

Nahibulong sila pagkahuman niini og limpyo mibalibad kini nga mokaon apan wala nila kini panumbalinga ug milakaw sila padulong sa Lapulapu diin ilang mga negosyo mahimutang.

Dangtan pila ka gutlo nakabantay siyang nabiyaan niya ang iyang singsing ug bracelet hinungdan nga ilaha kining gibalikan sa balay ug gisugo niya si Aying pagkuha niini ngadto sa ilang lawak.

Apan sa paggawas ni Aying nangatarungan kining wala niya kini makit-i hinungdan nga ilang gisusi ang ilang lawak ug diha nalang nila mahibaw-ing nahurot na og kahanaw ang tanan nilang mga alahas sa kwarto.

Nakabantay hinuon silang kadudahan kaayo ang linihukan niini hinungdan nga nagpatabang sila sa kapulisan ug didto ang mismong mga polis nakabantay sad nga daw nagkaangkaang paglakaw ang suspek apan hugtanong mihimakak nga siya                                                                           maoy mikuha sa mga alahas.

Hinungdan nga si Librada gihangyo sa mga polis nga kuyogan sa kasilyas ang suspek tungod kay nagduda silang duna kini gisuksok sa iyang kinatawo ug didto pahubuon ug palukso-luksohon.

Matud ni Librada nahibulong gyud sila samtang diha na sila sud sa kasilyas nga pugngan ni Aying ang iyang sampot matag molukso kini. Sa tanto niining lukso-lukso ug daw gikapoy na pagsige og pugong gikatahong milugwa sa kinatawo niini ang usa ka medyas.

Diha diay sa medyas gisulod sa suspek ang mga alahas sa iyahang agalon hinungdan nga gibalhog siya sa karsel ug gikatakdang pasakaan og kaso.(/EIM) (BANATNEWS)