Taga Philcadan misaway ni Cortes

CEBU, Philippines - Ang mga miyembro sa gipiling mga molupyo nga benepisyaryo sa 6.5 ka ektaryang relocation site sa Paknaan, dakbayan sa Mandaue   mikondenar sa hulga nga pugson sila sa pag-demolish kun dili sila mouyon sa nahisgutang proyekto ni Mandaue City Mayor Jonas Cortes. Sumala pa ni Josefina Caya, usa sa residente sa PHILCADAN nga ang mayor sa siyudad sa Mandaue murag nanghulga sa mga pobreng   molupyo gumikan kay wala man kini ikasukol sa mga opisyal sa kagamhanan sa maong dakbayan.

Matud pa ni Caya nga bisan og ang gitumbok ni Cebu City Mayor Mike Rama nga angayang unahon sa paglimpyo mao ang namuyo sa bukana o baba sa Mahiga creek   aron masulbad ang suliran sa baha sa duha ka siyudad, si Mayor Cortes gusto gyud nga palabihon ang pag-demolish sa mga molupyo nga mikwestiyon sa pamaagi sa pagpabalhin kanila ngadto sa buhatan sa Ombudsman Visayas.

Kini sa pagtuo sa mayor nga aron ang ubang mga urban poor nga pamilya nga balhinonon sa siyudad sa Mandaue mahadlok ug dili na lamang mukwestiyon sa relocation site nga gitanyag kanila.

Miingon si Caya nga usa sa gidilian nila sa maong relocation site sa Pacnaan mao ang paglubog niini sa tubig busa   gi-klasipikar    kini sa DENR nga usa ka timberland kansang presyo matag metro kuwadrado susama kamahal sa mga mahalong subdivision sa syudad.  

Gibasehan sa ilang reaction mao ang gi-konpirmar ni manlalaban Francisco Amit, ang Consultant on Socialized Housing sa syudad sa Mnadaue atol sa 68th regular session sa Mandaue City Council nga gihimo niadtong Oktubre 26, 2011 nga matud pa ang ilang timetable sa pagpatuman sa maong proyekto usa ra gyud ka bulan human ma-plot o matataw ang maong area.

Kini tungod kay ang Memorandum of Agreement tali sa siyudad sa Mandaue ug sa mga urban poor hingpit nang napirmahan ug gikinahanglan nga tumanon gyud ang mga probisyon sa duha ka mga partido.

Kini ang probisiyon nga natala sa MOA nga sulod sa 24 ka bulan kun duha ka tuig diin gikinahanglang mabayran na sa mga nanag-iya sa maong mga lote ang ilang bayranan base sa nasabutang prisyo.

Sigun sa minutos sa session sa konseho sa maong siyudad si Amit miingon nga ang 6.5 hectare relocation site sa Paknaan kapapuy-an og 12 ka mga komunidad o 1,225 ka mga pamilya apan ang ilang dawaton mao lang una ang duha ka mga komunidad, ang usa mao ang nahimutang sa duol sa Butuanon river nga nag-atubang sa Super Metro Mandaue ug kadtong atua sa PHILCADAN, sanglit ang nahimutang niining maong mga luna nga maoy puy-an sa nahisgutang mga communities dili man maabot sa tubig dagat bisan pa og taub.

Si Amit miangkon atubangan sa mga konsehal sa siyudad nga adunay bahin sa maong lote nga gitagana sa siyudad isip relocation site sa mga urban poor swampy o lapukon apan iyang gitataw nga natubag ra usab kini nila dayon tungod kay ang SM mihatag man og commitment nga molabay sa ilang mga basura sa maong lugar isip filling material ug kun mahimo nang mapuy-an ang maong lugar, ila usab nga tabangan ang ubang mga urban poor communities nga mobalhin na usab sa maong dapit.

Sigun gihapon sa maong minutos sa session sa konseho sa siyudad sa Mandaue, ang consultant sa siyudad sa maong dakbayan mitug-an sa konseho nga usa ka Technical Working Group nga gilangkuban sa City Engineer, City Planning and Development Coordinator, HUDO ug ubang mga buhatan sa goberno mirekomendar sa pagtukod og seawall sa maong dapit nga mogasto og laing usa ka gatos ka milyon ka pesos aron kapugngan ang pagkankan sa tubig dagat ug kapugngan ang baha sa nahisgutang lugar. (BANAT NEWS)