Bana sa Koreanang namatay mikiha

CEBU, Philippines - Miabot na sa dakbayan sa Lapulapu gikan South Korea ang bana sa Koreana nga namatay sa kadagatan sa Mactan niadtong Domingo sa udto.

Si Inspector Zenaido Pastorfide Jr., sa homicide section sa kapolisan sa maong dakbayan nga nahinabi sa Banat News miingon nga si Kim, kinsa   maoy bana sa namatay nga si Ji Sung Sook maoy mipasaka og kaso nga reckless imprudence resulting to homicide batok kanila ni Jovanni Paquibot ug Alisen Tongco Jr.

Si Paquibot maoy nagmaneho sa jet ski nga miguyod sa banana boat nga gisakyan ni Ji Sung Sook, nga nadasmagan sa pump boat nga gimaneho usab ni Tongco.

Gumikan sa kusog nga pagkadasmag, nalagpot ang biktima sa dagat kauban sa lain pang duha ka Koreana, apan si Sook maoy nahiagom sa kamatayon.

Dugang pa ni Pastorfide nga human nila maandam ang tanang mga dokumento kalabot sa maong aksidente ila dayong giduso ang kaso ngadto sa buhatan sa piskalya kagahapon.

Sa nasayran nga kusog kaayong nagdagan ang jet ski nga gidala ni Paquibot tadlas sa kadagatan duol sa Sea Adventure Aqua Sports Resort sa barangay Maribago sa dakbayan sa Lapulapu niadtong miaging Domingo sa udto dihang nahinagbo niini  ang pump boat nga gidala usab ni Tongco nga kargado sa mga pasahero nga nag-island hopping niadtong higayona dihang   nadasmagan niini ang banana boat nga giluwanan ni Sook ug sa duha ka kaubang Koreana niini.

Ang duha ka angol nga Koreana nagpabilin pa karon sa tambalanan samtang si Paquibot ug si Tongco nagkagulkol na sa prisohan. (WC)(BANAT NEWS)