Tulisan gidemalas kay polis iyang gitulis

CEBU, Philippines - Pwerteng demalasa sa usa ka tulisan human ang iyang gitulis nga drayber sa pasaheroang multicab polis diay nga nag-sideline og pamasahero nga miresulta hinuon sa iyang pagkaangol ug pagkabalhog sa karsel.

Ang insidente nahitabo niadtong milabay’ng tungang gabii diha sa National Highway sa barangay Estaca, lungsod sa Compostela dihang si PO1 Maximo Moneva Jr., 26, gitionan og armas sa gitumbok nga tulisang si Rexil Sacasan, 28, taga sitio Colo, barangay Cahumayan sa dakbayan sa Danao.

Si Moneva nga nagpuyo sa barangay Tapul, lungsod sa Tabogon kasamtangang nadestino sa City Public Safety Company (CPC) sa Mandaue City Police Office (MCPO) apan day-off niya nianang mga orasa.

Si PO2 Ronald Luna, sa Compostela Police Station mibutyag nga si Moneva namasahero sa rotang Mandaue padulong sa Compostela dihang kalit kining gipara sa suspek diha sa sitio San Antonio sa barangay Jubay sa lungsod sa Liloan ug misakay.

Matud ni Moneva ngadto sa kapolisan sa dihang naabot na sila sa barangay Estaca mideklarar og tulis ang suspek dungan sa pagtion kaniya og armas hinungdan nga iyang gitunol ang iyang kinitaan.

 Imbes nga mokanaog human makuha ang salapi misakay gihapon ang suspek apan pag-abot sa barangay Poblacion sa Compostela kalit gitamakan ni Moneva ang brake.

Si Sacasan nga wala makabantay maayo pagkadarok ug naumod ang dagway niini sa salog padulong sa atubangan ug dihadiha gilayog kini ni Moneva apan tungatunga sa panaglayog nakablitan ang armas ug natapsingan ang ulo sa tulisan.

 Ang mga estambay sa maong lugar nga nakakita sa insidente mitawag dayon og mga polis.

Nakuha gikan ni Sacasan ang usa ka Black Widow revolver nga may upat ka buhing bala ug usa ka kabhang sulod sa tambor niini sa .22 magnum ug pitaka nga may sulod nga mga ID cards ug uban pang butang nga gituohang iya sa mga nabiktima niini.

 Si Sacasan gidala sa Compostela Health Center aron patambalan ang iyang samad sa ulo ug gipagawas ra sab siya dayon sa doktor human masuta nga dili kuyaw ang iyang kahimtang.

 Kasong robbery ug illegal possession of firearm batok sa suspetsado ang gikatakdang ipasaka sa piskalya karung adlawa. (/EIM)  - (BANAT NEWS)