Chiong misuporta sa anti-Graffiti campaign

CEBU, Philippines - Si Mayor Valdemar Chiong sa city of Naga uban sa mga kapitan sa maong siyudad mipadayag og siyento porsyentong suporta sa Anti-Graffiti campaign ni Governor Gwendolyn Garcia atol sa ilang tigom uban sa gobernadora didto sa Kapitolyo niadtong adlaw nga Biyernes.

Matud pa ni Mayor Chiong nga sama sa lungsod sa Minglanilla, ang siyudad sa Naga manglimpyo usab sa daplin sa kadalanan ug pintalan ang mga graffiti o mga suwat-suwat nga sagad makita sa mga pader daplin sa karsada.

Si Chiong miingon nga gawas sa paglimpyo sa daplin sa kadalanan, ang iyang buhatan inabagan sa tanang mga kapitan sa siyudad motanum usab og mga kahoy sa daplin sa dalan ug ubang bahin sa siyudad sa Naga aron kaprotektahan ug mapreserbar sa kalikopan.

Sigun pa ni Chiong nga ang maong lakang preparasyon usab kini alang sa pag-host sa siyudad sa horse show competition nga pasiugdahan sa kagamhanan sa lalawigan sa Sugbo aron makadani sa mga mahiligon og lumba sa kabayo sa tibuok nasud karong umaabot nga Disyembre.

Ang mayor sa siyudad sa Naga miingon usab nga kaabag niya sa pagsuporta sa Anti-Graffiti campaign sa probinsiya mao ang mga barangay official lakip na ang mga kabataan.

Misaad ang mayor nga sa higayon nga mobisita na og balik sa Naga si Gobernador Garcia karong Disyembre 10 ning tuiga, aduna nay kausabang makita ang gobernadora. (BANAT NEWS)