CEBU, Philippines - Gimando ni Gobernador Gwedolyn Garcia sa iyang mga piniyalan sa Kapitolyo nga dalion ang paghatag og hinabang nga mga bugas, sardines, banig, tsinilas, habol ug mga kasangkapan sa kusina ang mga nabiktima sa sunog sa sitio Pulang Bukid sa barangay Alang-Alang sa dakbayan sa Mandaue.
Kini human mohangyo si Provincial Board member Thadeo Ouano ngadto sa gobernador kinsa gibati usab og kahingawa sa kahimtang sa mga nasunogan.
Si Board Member Ouano miingon nga ang iyang buhatan mao karon ang gitahasan sa pag-andam sa maong hinabang nga gibase usab sa gidaghanon sa natala nga mga biktima sa buhatan sa City Social Welfare and Services ug sa buhatan sa barangay Alang-Alang.
Ang buhatan sa CSWS nga gipangulohan ni Violita Cabada unang nakapanghatag og hinabang nga pagkaon alang sa pamahaw, paniudto ug panihapon sa mga biktima.
Apan segun pa ni Cabada nga naandan na nila ang pamaagi nga kutob ra sa tulo ka adlaw ang ilang paghatag sa maong hinabang pagkaon.
Sa nasayran, mikabat sa 200 ka pamilya sa maong dapit ang nawad-an sa ilang mga panimalay human sa kalit nga pag-ulbo sa kayo niadtong Biyernes sa hapon.
Ang mga opisyal sa barangay Alang-Alang mipahigayon dayon og session diin ilang gideklarar ang maong dapit nga ubos karon sa state of calamity.
Kini aron makahigayon sila sa paggamit sa calamity fund sa ilang barangay.
Si Mayor Jonas Cortes dali usab nga nakapadala og mga tolda sa maong dapit alang sa temporaryong kapasilongan sa mga biktima sa sunog uban usab sa mga portable toilet. (BANAT NEWS)