Lawas patay sa Fil-Am nabaho

CEBU, Philippines - Usa ka Filipino-American Citizen ang napalgang patay ug paingon na sa pagkadugta sulod sa usa ka lawak sa usa ka pension house sa barangay Mabolo ning dakbayan sa Sugbo sa miaging gabii.

Ang lawas patay kansang hinungdan sa kamatayon gisusi pa sa kapolisan iya   ni Raul Capuno, 77, usa ka retired store keeper sa usa ka hospital sa New Jersey ug temporaryo kining nagpuyo sa CITI Pension House sa Mabolo.

Sa gihimong imbestigasyon sa kapolisan nasayran gikan kang Timotheo Remedio Jr., tag-iya sa maong establisamento nga   naglakaw siya sa palibot sa iyang Pension House dihang nakatimaho siya og baho sa patay gikan sa lawak nga gi-ukopar ni Capuno.

Busa iya kining gituktok apan walay   mitubag kaniya, maoy hinungdan nga gisugo niya ang iyang sakop nga si Wilson Casas   sa pagsusi sa maong lawak nganong may nanimahong   patay sa sulod niini.

Tungod kay dili maabli ang pultahan didto na sa bintana sa lawak moagi si Casas. Apan sa pagsulod niya sa maong lawak, maoy misugat sa iyang mga mata ang nagbuy-od sa sawog nga lawas patay ni Capuno nga mibutod na ug   puwerti nang bahoa.

Si Remedio daling mitawag sa buhatan sa kapolisan aron masusi kun naunsa si Capuno apan sa ilang nasuta nga walay mga samad o bun-og ang lawas ni Capuno busa wala sila’y pagtuo nga gipatay kini og laing tawo.  (WC)(BANAT NEWS)