Krimen sa Talisay mikibra

CEBU, Philippines - Ang gidaghanon sa krimen sa dakbayan sa Talisay mikunhod niining tuiga base sa talaan sa Talisay City Police Station.

Sa ilang talaan sugod niadtong Enero 1, 2010 hangtud Septiyembre 30, 2010 ang crime volume sa Talisay mikabat sa 576.

Sa maong gidaghanon 411 niini ang index crime ug 71 ang non-index crime, samtang   94 ang gitawag nga “other non-index crime”.

Ang index crime o “crime against person and properties” gilangkuban sa theft, robbery, homicide, physical injury ug rape. Samtang ang non-index crime o “special laws” gilangkuban kini sa ginadiling drugas, illegal logging, fishing ug uban pang balaod sa pagpreserba sa kalikopan.

Sa nahisgutang mga buwan ug tuig ang crime solved o nasulbad nga krimen, (buot pasabot nga dunay nasikop nga suspetsado ug napasakaan og kaso ngadto sa korte) mikabat sa 180 ang gidaghanon.

Samtang ang “crime cleared” o ang suspetsado wala masikop apan nailhan ug napasakaan og kaso ngadto sa korte mikabat sa 101 ang gidaghanon ug ang “unsolved crime” o wala masulbad nga krimen mikabat sa 188 ang gidaghanon.

Sa maong mga buwan ubos sa nahisgutang tuig ang siyudad dunay 50.39 porsiyento nga Crime Solution Efficiency (CSE) og 35.21 porsiyento nga Average Monthly Crime Rate (AMCR) o gidaghanon sa krimen matag buwan.

Gikan sa Enero 1, 2011 hangtud Septiyembre 30, 2011 ang siyudad adunay 520 lang ka mga krimen diin 333 niini ang index crime,108 ang non-index crime og 87 ang other non-index crime.

Ang crime solved mikabat sa 197, ang crime cleared, 117, unsolved crimes, 141.

Sa maong mga buwan niining tuiga ang Talisay dunay 61.26 porsiyento nga CSE ug 33.92 nga AMCR. (BANAT NEWS)